KRALENDIJK – Ta reinando un intrakilidat den e sektor di seguridat na Boneiru. Esaki ta sali na kla for di informashon ku  Federashon General di Trahadónan Boneiriano (AFBW) a duna. 

Siman pasá, e sindikato a organisá un dia habri spesífikamente pa empleadonan di seguridat inskribí na e sindikato. E sindikato tambe ta saliendo na defensa di un grupo di empleado ku a ser informá pa un kompania di seguridat siman pasá ku entrante dia promé di aprel nan lo no tin trabou mas na e kompania en kestion. 

Presidente di AFBW, Cherrel Kwidama, ta kondená e akshonnan di e kompania i ta den deliberashon ku RCN-unit SZW pa determiná kon lo dil ku a situashon aki. 

Mas amplio

Segun konsehero di AFBW Norwin Willem, kiko ta pasando na e kompania en kestion ta solamente un frakshon di tur kos ku ta bayendo malu den e sektor. Willem a bisa ku empleadonan di kompanianan di seguridat te asina leu a duna pa registrá ku sindikato. “Sinembargo, empleadonan ku ta afiliá nan mes na un sindikato ta risibí sosten, pa nan no ta pará nan so ora nan enfrentá un dunadó di trabou ku no ta kumpli ku e regla”. 

Segun Willem ta bisa, tin hopi mas violashon kontra di regla spesialmente den e sektor di seguridat, pero tin mas sektor na unda ku e situashon no ta bon. Willem a menshoná akinan spesífikmente e sector hotelero.