KRALENDIJK – Salú di habitantenan di Boneiru ta na peliger pa motibu di maneho insufisiente di sushi i e reakshon defisiente di outoridatnan. E último simannan a diskutí intensivamente tokante e tópikonan krusial aki. Den diferente enkuentro e organisashon di habitantenan Asosiashon Pro Lagun a ekspresá su preukupashon pa loke ta trata e rísikonan di salú serio i e reakshonnan inadekuá di e kompania di rekohé sushi Selibon. E organisashon ta hasi un yamada pa mehorashonnan urgente pa tantu salubridat di Boneiru komo e maneho di sushi riba e isla.

Salú di habitantenan di Boneiru ta bou di preshon. Esei Asosiashon Pro Lagun a laga sa den un remetido. Djabièrnè 25 di òktober e organisashon a presentá su plannan na habitantenan, gobièrnu i media. Diputadonan Clark Abraham i Anjelica Cicilia tabata presente. Un bosero di Selibon tambe tabata presente djabièrnè.

Kasonan trágiko 

Farid Ayubi, un habitanta embolbí ku ta biba serka di e seru di sushi, ta un di e inisiadónan di Asosiashhon Pro Lagun. “Mi ta un di e leonnan, ku ta bringa pa añanan largu kontra e mònster aki,” Farid ku tabata visiblemente emoshoná a laga sa di e kompania di manehá sushi. “Na 1991 mi a bai biba den besindario di Lagun ku e tempu ei tabata bunita ainda. Tabatin bunita pòtrèt i nos tabatin bista riba laman. Na 1995 Selibon a bin basha su sushi akinan. For di e tempu ei hopi habitante akinan tin problema ku salú i tin asta kasonan trágiko di por ehèmpel morto di un beibi i amputashon di pianan di un mucha muhé tiner pa motibu di un bakteria ku a surgi. Ami mes tambe tin keho médiko debí na e stòfnan ku mi a inhalá akinan. Desde ku Selibon a bini akinan nos a hiba hopi kombersashon ku outoridatnan i e kompania di prosesá sushi. Apesar di hopi promesa ku nos a haña komo habitante, tiki te nada a sosodé.”

Kalidat di aire ta malu 

Presidente Jan Verbeek di Asosiashon Pro Lagun ta añadí ku un punto spesífiko di kuido ta e kalidat di aire malu rondo di e lèntfel. “Nos ta biba apenas tres kilometer for di e lèntfel i hopi famia, entre nan esun dimi, ta añanan largu eksponé na deskargo dañino. Esaki no por sigui asina,” e ta bisa. “E kandela grandi riba 10 di mei 2024 a empeorá e situashon. Kuanto veneno mas e habitantenan di Boneiru mester inhalá?”

Konsentrashonnan haltu di kobalt, zenk i koper den e sistema eko di Boneiru

Pa splika e asuntu mas mihó, eksperto ambiental Yoani Kuiper tabata na mesa. “E loke ta sosodé den nos propio kurá ta un katástofe ambiental sin duda,” el a laga sa mesora bon kla. Segun Kuiper a haña konsentrashonnan haltu di metal pisá manera kobalt, zenk i koper  den e sistema eko di e lagun den serkania. “E área di naturalesa bunita aki, ku su palunan di mangel i turtuganan di laman ta bou di menasa serio,” Kuiper ta bisa. “I no ta esei so. Pa medio di e deskargo di gasnan e bisindario direkto di e lèntfel tin un chèns mas grandi pa haña kanser.”

Un rapòrt di inspekshon di Nederlandse Inspectie Leefomgeving en Transport (ILT) ta konfirmá e konklushonnan di Kuiper. “Tur hende lo mester lesa e rapòrt aki, e ta preukupante,” Kuiper ta insistí. E incinerator di Selibon, ku mientrastantu nan a pone para ketu, lo a emití pa añanan largu supstansianan dañino segun e organisashon. Kuiper ta enfatisá e nesesidat di un investigashon di salú ekstenso pa e habitantenan: “Hendenan na Boneiru tin e derecho di sa kua peliger(nan) nan ta kore.”

Kas será hermétikamente 

Durante un bishita di diferente media na lagun, e seru di sushi i e víktimanan e seriedat di e situashon tabata evidentemente visibel. Den besindario di e seru di sushi por a haña sushi te leu ayá. Habitante Farid Ayubi a mustra su kas, ku tabata hermétikamente será. Su bentanan tabata di plak ku teip, karton òf glas akríliko. Via e èrko e tabata purba haña aire ‘fresku’. Bayendo su veranda e holó di e seru di sushi ta dal bo mesora. El a mustra tambe un di su kachónan, ku visiblemente tabatin problema neurológiko. Riba e seru di sushi bo por a mira ku tabatin poko maneho. Bishitantenan tabata tira nan sushi na diferente sitio, loke tabata kondusí na un plaga di muska. No por a papia di separashon di sushi na e lèntfel.

Lèntfel na Lagun tabata ehèmpel 

Pa Verbeek su kana a yena. E ta mira promesanan ku a bini di gobièrnu i Selibon komo tempu perdí. Verbeek ta mustra riba rapòrtnan anterior, bou di kua e plan di sushi i ehekushon di 2013. “Den un di e rapòrtnan a rekonosé e rísikonan di mal maneho di sushi kaba, pero for di e tempu ei tiki a kambia. Ministerio di Infrastruktura i Medio ambiente a ofresé su sosten e tempu ei, pero sin akshon konkreto nos ta keda atras ku nos preukupashonnan. Tambe a presentá un tempu e plan di maneho di tira sushi pa e lèntfel di Lagun komo un ehèmpel pa otro islanan Antiano,” segun Verbeek. “Lástimamente nos mester konstatá ku e promesanan di 2013 di Selibon i gobièrnu nunka a bira realidat. Esaki ainda ta e kaso. E situashon ta inakseptabel i salubridat públiko ta na peliger.”

Asosiashon ta duda den firmesa di gobièrnu 

Den e remetido di e Asosiashon a menshoná diferente término. Por ehèmpel e asosiashon ta èksigí ku OLB i Selibon mester aktuá dentro di 30 dia. Ya tin djeskuater dia a pasa. Diputado Nina den Heyer a laga sa ku e término menshoná den e karta aki ta difísil pa alkansá.

E último añanan a traha diferente palabrashonnan di término ku gobièrnu i Selibon, pero segun Verbeek hopi biaha no a kumpli ku nan. “E komunikashon ku e kolegio ehekutivo aktual ta fèrfelu. Apesar di esfuersonan pa pone kontakto, nos ta haña tiki reakshon. Ta p’esei awor si nos a bini ku palabrashonnan di término. Nos a skohe pa 30 dia, pasobra mester aktua lihé. Si di antemano nos duna nan por ehèmpel 90 dia pa pensa, nan ta pidi 180. Asina e ta funshoná,” e ta splika. Apesar di e promesanan di e outoridatnan pa tuma akshon, Verbeek ta keda duda. “Djesun aña pasá nan tabata trahando tambe riba esaki. Na e momento aki nos ke dialogá ku nan. Tempu pa imponé kosnan hurídiko por bini ainda,” e ta enfatisá. 

Verbeek ta boga pa tres eksigensia kla ku mester realisá dentro di un luna. Na promé lugá, “un investigashon di medio ambiente i salubridat kompleto hasí pa RVIM, kaminda ta analisá salubridat di e poblashon riba e isla.”  Na di dos lugá, “Selibon, Entidat Públiko Boneiru i ministerio mester presentá un plan pa paga e kandelanan i evitá mas krísis.” Na di tres lugá, “mester atendé urgentemente  ku bibienda di e habitantenan serka di e lèntfel.”

E frustrashon di Verbeek ta bisto: “Nos no por kambia historia, pero si nos por mehorá futuro di e hendenan ku ta sufri bou di esaki. Ta inakseptabel ku habitantenan di Boneiru ta eksponé ainda na supstansianan peligroso sin ku ta tuma akshon.”