WILLEMSTAD – Wardakosta ta yama hóbennan entre 18 i 25 aña pa inskribí nan mes pa e Kurso Básiko di Wardakosta. E kurso ta un programa di un aña konsistiendo di módulonan práktiko i teorétiko, inkluso un kurso pa Polis èkstraordinario.

Tantu hende hòmber komo hende muhé por inskribí pa e Kurso Básiko di Wardakosta. Durante e kurso e aspirantenan ta haña konosementu básiko di Prome Asistensia i habilidat di tiru. Tambe enseñansa nóutiko i módulonan den entrenamentu básiko pa ekipo di reskate, kombatimentu di kandela, lei di wardakosta i manual di radio VHF ta parti di e pakete di lès.

Pa por inskribí e kandidatonan mester tin nashonalidat hulandes i mester ta inskribí na Aruba, Kòrsou, Sint Maarten òf e islanan BES. Nan edat mester ta entre 18 i 25 aña pa por kuminsá e kurso.

Wardakosta ke personanan ku tin minimal un diploma di MAVO-4, VMBO/VSBO òf un diploma di enseñasa sekundario semehante. Ta eksigí un diploma di landamentu, tambe kandidatonan mester por lesa i skirbi e idioma Hulandes bon, mester tin un bon kondishon físiko i no mester bisti ni brel ni lèns. Un registro di kastigu di prizòn ta nifiká un no go.

E kurso ta start na luna ougùstùs di e aña aki.