PHILIPSBURG – E interupshon regular i na eskala grandi na Sint Maarten mester ta pronto tras di lomba. Djadumingu último a yega shete generadó di kònteiner nobo na Sint Maarten, The Daily Herald ta informá. E instalashon di e generadónan ta kuminsá inmediatmente. Segun e kompania di elektrisidat GEBE e yegada di e generadónan ta un parti krusial di nan plan inmediato pa atendé ku e skarsedat di koriente resien ku a kondusí na interupshon di koriente for di fin di luna di mei.

“E yegada di e shete generadónan di kònteiner, ku ta bon pa 10 megawatt (MW) na tur, ta un paso importante den e esfuersonan pa stabilisá suministro di koriente i garantisá koriente konfiabel pa e komunidat di Sint Maarten,” GEBE ta informá den un kominikado di prensa djasabra, un dia promé ku yegada di e generadónan.

Segun GEBE e añadishon di 10MW di e generadónan temporal ta yuda pa kumpli mihó ku e demanda di elektrisidat di e isla i resolvé e eskases aktual. “Komo konsekuensia di esaki habitante- i empresanan por spera un redukshon signifikante di e frekuensia i durashon di interupshon di koriente, ku eksepshon di situashonnan di emergensia imprevisto,” segun GEBE.

Segun e komunikado di prensa banda di e solushon inmediato aki  GEBE ta traha tambe na  solushonnan riba término korto (generashon di konteiner 20MW) i permanente (27MW) pa garantisá un suministro di koriente duradero i resistente pa Sint Maarten. “E esfuersonan ámplio aki ta dirigí riba resolvé tantu e retonan aktual komo e demanda di elektrisidat den futuro.”