WILLEMSTAD – CDM Holding i Damen Shipyards Group  ta invertí huntu mas ku 71 mion florin den Damen Shiprepair Curaçao. E modernisashon ámplio di e dòk, ku ta paga ku e sèn ei, ta nifiká un refuerso konsiderabel di e posishon di Kòrsou komo sentro marítimo den área di Karibe.

Kòrsou ta usa pa e invershon aki e kontribushon di mas ku 35 mion florin ku Hulanda a primintí pa sosten individual pa empresa komo parti di e ayudo di corona.

“E astiero tin un posishon stratégiko den e klùster marítimo di Kòrsou”, minister Ruisandro Cijntje di Desaroyo Ekonómiko ta bisa. Si anteriormente Damen mester a kita ochenta hende, ku e inyekshon di kapital tin atrobe perspektiva pa e 190 trahadónan ku tin ainda. Segun minister Cijntje e astiero ta proveé masoménos mil kupo di trabou dirèkt i indirèkt i ta aportá ku un kontribushon pormedio di 0.6 porshento na e produkto bruto nashonal interno i kuater porshento na reservanan eksterior.

Edukashon i entrenamentu

Tantu e hürdo Damen komo CDM Holding, doño di e tereno di dòk i e fasilidatnan, ta invertí den e dòk. Pa esaki CDM Holding por hasi uso di e mas ku 35 mion florin ku Hulanda a pone disponibel pa Kòrsou.

Tur e invershonnan ta na benefisio di e infrastruktura di e dòk. Espesialmente e dos dòknan ku nan a koba. “Asina por garantisá ku e dòk ta keda un bon ambiente di trabou pa e añanan benidero, ku oportunidat pa edukashon i entrenamentu”, Getmar Caldera ku ta CEO di CDM ta splika.

Akuerdo di finansiamentu 

For di febrüari 2017 Damen ta manehá e dòk ku a kuminsá na 1959 komo N.V. Curaçaose Dok Maatschppij. E situashon di i espektativanan pa e dòk a kambia drástikamente for di 2017 pa motibu di entre otro seramentu di e refineria i e terminal di petroli na Kòrsou, e bòikòt di Venezuela, e konsekuensianan di Corona i e situashon total den sektor di zeta i gas. E dòk tin algun aña tras di lomba ku tabata hopi desepshonante finansieramente.

Promé tabata e kompania mama di Damen na Hulanda ku a apsorbé e pèrdidanan di e dòk na Kòrsou. E pandemia di Corona a buta ku e kompania mama no tabatin e posibilidat ei mas i a bati na porta di gobièrnu di Kòrsou i CDM Holding pa ayudo den verano di 2020.

Na final di 2020 Konseho di Minister di Reino a bai di akuerdo pa un pakete di ayudo ámplio pa Kòrsou pa sobreviví e pandemia. Esei tabata inkluso un montante di 20 mion euro pa sosten individual pa empresa. Gobièrnu di Kòrsou a sugerí Hulanda pa tuma den konsiderashon pa CDM Holding i Damen Shiprepair Curaçao  bini na remarke.

Potensial

Damen Shipyards Group ta kere ainda den e potensial di e lokalidat na Kòrsou. Pa por keda hunga un papel importante pa empleo na Kòrsou, i alabes pa e posishon di e pais komo sentro marítimo dan área di Karibe, ta hasi e dòk prepará pa futuro ku e invershonnan aki.

E plan di nogoshi pa e dòk ta pèrkurá pa  un direktiva nobo i na midí, anulashon di debenan i sufisiente kapital pa futuro serkano. E dòk a bini na remarke pa e ayudo despues ku un grupo di trabou independiente a konkluí ku e plan di nogoshi di Damen Shiprepair Curaçao ta viabel.