WILLEMSTAD – Komishonnan fiho pa relashonnan di Reino di Eerste i Tweede Kamer ta partisipá for di djamars 28 di febrüari te ku djabièrnè 3 di mart na e Konsulta di Reino Interparlamentario, IPKO, na Kòrsou.

Riba agènda tin e akohida di fluho di migrantenan dentro di Reino, relashonnan mihó i duradero dentro di Reino, e defisiensia demokrátiko den struktura di Reino i e palabrashonnan di e reformanan na Aruba, Kòrsou i Sint Maarten ku ta definí den Landspakket. Ta trata di enseñansa, klima i medioambiente i seguridat di data.

Tambe e delegashonnan ta sigui papia di e pasado di sklabitut i e efekto di e historia kolonial den e mundu di awe. Esaki komo kontinuashon riba kòmbersashonnan den anterior IPKOnan. Dentro di IPKO Parlamento di Kòrsou ta organisá riba djaweps 2 di mart un bishita di trabao pa tur delegashon ku ta para den lus di pasado di sklabitut i pasado kolonial.

IPKO ta e struktura di konsulta di e parlamentonan di e paisnan di Reino Hulandes. Delegashonnan di Staten-Generaal  i di Parlamentonan di Aruba, Kòrsou i Sint Maarten ta konsultá dos biaha pa aña riba temanan ku ta konserní e paisnan di reino. Un biaha ta ten’é na Hulanda i un biahe den un di e paisnan Karibense.  

Bishitanan di trabou na Boneiru

Rondó di IPKO tin mas bishitanan di trabou. Promé ku e IPKO e delegashon Hulandes ta hasi un bishita di trabou na Boneiru riba djadumingu 26 i djaluna 27 di febrüari.

Tópikonan manera e plan di maneho nobo di Naturalesa i Medioambiente, maneho di awa, e inundashonnan resien, maneho di sushi, bibienda popular i klima i preservashon lo ta sentral.