WILLEMSTAD – Jacinta Constancia lo presentá su mes riba e dia ku ta solisit’é pa sinta su kastigu di prizòn. Ku e palabranan aki e anterior minister a reakshoná riba rumornan ku tabata sirkulá ayera ku e lo mester bai prizòn awe pa sinta su kastigu di prizòn di 20 luna. 

E asuntu di tapaboka Dubnium ta trata di estafa di Stichting Buro Ziektekostenvoorzieningen BZV. Korte ta di opinion ku Constansia i su kasá a estafá BZV ora nan a entregá na 2021 un oferta i un faktura pa entrega di alrededor di 40.000 tapaboka na BZV, mientras nan no tabatin intenshon nunka pa entregá e tapabokanan aki na BZV.

Banda di e kastigu di prizòn Korte a duna Constancia komo kastigu adishonal prohibishon pa okupá e funshon di minister pa sinku aña.

Lucha hurídiko

Constancia a deklará ku no ta un sekreto ku e ta embolbí pa mas ku nuebe aña kaba den un lucha hurídiko pa prueba su inosensia.

E anterior minister mes ta haña ku e no a malversá sèn, no ta kulpabel di froude òf labamentu di plaka, pero ku tòg ta ten’é responsabel pa komplikashonnan. “Esei ta e úniko punto, nada otro. Jacinta no a hasi daño na ningun hende,” segun Constansia ta deklará na Èxtra.

E ta deklará na e matutino ku a kastigu’é sinku biaha. “Mi mester paga un beslag di 365.000 florin, ku otronan a risibí di SVB i a gasta. Tambe a hasi daño na mi imáhen komo hende muhé, hende i polítiko.” “Ademas mi mester sinta mi kastigu i lo hasi esei tambe i den boka di pueblo ta yamami un ladron i un kriminal. Ta violá mi derechonan komo hende i hende muhé,” segun e èks-minister.

Constancia ta bisa ku e ta agradesido na abogado Sulvaran ku a hasi su trabou pa desmostrá su inosensia i a bari insinuashonnan ku no ta basá riba bèrdat for di mesa manera malversashon i froude. “E sèn di SVB tambe ta for di mesa. Ta kastigá Jacintha pasobra e mester tabata sa kiko ta pasando i a duna su eks-partner sèn pa ‘kasonan den banda i konspirashon. “No tin ningun dokumento, informashon òf relato ku ta prueba ku mi a hasi algu robes. Shonnan, mi no ke ofendé bosnan, pero boso forsa ta den orashon.”