KRALENDIJK- Djarason anochi e kompania di Aviashon JetAir Caribbean a ehekutá su promé buelo pa Boneiru. For di awor, e aerolina lo ehekutá un total di 2 buelo pa siman, riba djarason i djabièrnè.

E buelonan ta wòrdu ehekutá den kombinashon ku Aruba. Riba djarason e buelo ta sali for di Kòrsou via Aruba pa despues baha na Boneiru. E parti di Boneiru pa Kòrsou ta un buelo sin parada. 

Riba djabièrnè e buelo di Kòrsou ta sali for di Kòrsou pa yega Boneiru sin parada, pero regresando si e buelo ta pasa Aruba promé. Di e forma aki JetAir lo ofresé buelonan entre Boneiru i Aruba tambe. 

Medellín

Segun un komunikado di e kompania, e buelonan lo ofresé tambe un konekshon interesante pa i for di Medellin. JetAir aktualmente ta bulanda for di Kòrsou pa Aruba, Boneiru, St. Maarten, Sürnam, Kingston i Medellín. E kompania actualmente ta bulanda pa Republika Dominikana ainda, pero e buelonan ei ta bai stòp dentro di poko.