WILLEMSTAD – E kalor ekstremo na Kòrsou ta motibu pa un demanda rèkòrt di koriente. Ainda no tin problema ku entrega di koriente. Djaluna último tabata trata di 138 megawatt. Sinku megawatt mas ku e último rèkòrt ku ta data di 2016. E demanda di koriente tabata un averahe di 115 megawatt e último dianan.

Aqualectra ta bisa ku e demanda máksimo ku ta seif ta 135 megawatt. Despues di esei por sosodé ku mester interumpí koriente entre e barionan, pa asina por lo ménos tur hende tin koriente durante dia. Pero te ku awor esei no tabata nesesario.

E distribidó di koriente tin un kapasidat total di kasi 220 megawatt pa dia. 151 ta prosedente di mashinnan disel konvenshonal, 22 ta bini di turbinanan di gas mas limpi i alrededor di 46 megawatt  ta produkshon di molinanan di bientu na Tera Kòrá i playa Kanoa.

A konsekuensia di trabounan di mantenshon e kapasidat total ta mas abou. Na e momentu aki dos mashin ta for di uso pa tempu largu. Aqualectra ta spierta pueblo pa usa koriente konsiente.