Kampaña anual di bakunashon kontra di grip (influenza) ta bai start na Boneiru

KRALENDIJK- E siman akí a kuminsá e programa anual di angua kontra grip na Boneiru. Hendenan den grupo di riesgo por tuma kontakto ku dòkter di kas pa traha sita pa e angua ku ta grátis.

Hende riba 60 aña, hende ku malesa (manera diabétis, malesa di kurason, pulmon òf nir) òf un resistensia abou, ta kore mas riesgo di salú ora nan haña grip. Ora un hende pasa e angua di grip, su kurpa ta reakshoná trahando antikurpa kontra e vírùs di grip. Esei ta pone ku e chèns pa haña grip ta mas chikitu. Por sosodé ku e persona akí tòg ta haña grip. E angua kontra grip ta sòru e ora ei ku e ta bira ménos malu i e chèns pa komplikashon, manera pulmonia òf problema ku kurason, ta mas chikitu.

Prevenshon

Gobièrnu ta nota ku grip ta plama di mes manera ku COVID-19. P’esei ta konsehá pa tosa i nister den èlebog òf den un lensu di papel i regularmente laba man ku awa i habon. E angua kontra grip ta protehá solamente kontra e vírùs kontra grip. Pues personanan ku a haña e angua di grip, no ta protehá kontra otro vírùs, manera e vírùs ku ta duna fèrkout òf e vírùs di corona.

Departamentu di Salubridat Públiko di Entidat Públiko Boneiru ta organisá e programa den koperashon ku dòkternan di kas.