KRALENDIJK – Maurison Martines, mihó konosí bou di e nòmber Mau bikelife riba Instagram, ta un nòmber ku ta sinónimo ku akrobasia ku BMX, trikinan ku kuat i motor na Boneiru. Den un entrevista eksklusivo e ta kompartí su biahe di un fanátiko di baiskel hóben te un di e hòmbernan di akrobasia mas renombrá di e isla. Martines ta konta di su deseo pa un parke di ‘skate’ na Boneiru, un sitio ku lo no sostené solamente su pashon, pero ku lo ofresé tambe un lugá sigur pa e generashon mas hóben di amantenan di akrobasia. 

Martines a kuminsá su aventura na 2013, ora el a realisá su promé salto riba un baiskel BMX. “Nos a kuminsá mainta tempran 8’or. Henter dia mi tabata trein. Riba un rampa di palu ku nos mes a traha den un kasita nos a purba di trein tur sorto di kos. Mi meta tabata pa realisá  un ‘backflip’ (salto patras) riba e BMX. Kuartu pasá di sinku atardi numa e tabatin éksito. Mi a logra. Mi a riska hasi e ‘backflip’, despues mi a aterisá nèchi riba dos wil. Probablemente tabata e komienso di mi karera di akrobasia,” e ta kòrda. Su perseveransia i kurashi a hib’é tòp di mundu di BMX den área di Karibe. Na 2014 el a optené e promé lugá den un kompetensia grandi na Trinidad i Tobago.

Despues di BMX ta sigui motor i kuat 

Ora e kompetensianan BMX a mengua i defakto Martines tabata tin tiki kompetidó ainda, el a dirigí su atenshon riba motor i kuat. Via diferente pelíkula ku e ta kompartí riba su medianan sosial bo por wak por ehèmpel ku e por kore riba dos wil riba un kuat i hasi na mes momento un ‘handstand’ (para vèrtikal) riba su vehíkulo. Su abilidatnan i kreatividat riba e kuat a dun’é rekonosimentu internashonal, entre kua un invitashon pa bai kore na Dubai. “Mi a haña un invitashon di un sjeik pa bai kore ku su yu hòmber  na Dubai. Nan tabata siguimi riba medianan sosial i tabata fanátiko grandi. Tur kos tabata reglá na Dubai. Tabata un bunita aventura,” Martines ta konta orguyoso.

Falta di posibilidatnan 

Ounke su éksito- i ehersisionan ta impreshonante, Martines ta keda frustrá pa motibu di e skarsedat di fasilidatnan na Boneiru. No a realisá por ehèmpel e promesa di e kolegio ehekutivo anterior pa traha un pista di aselerashon pa motor i outo. Ku e yamada  nobo di Martines e ta spera ku lo enkurashá gobièrnu pa tuma akshon pa realisá por ehèmpel un parke di ‘skate’ pa hóbennan. “Nos no tin akinan por ehèmpel un parke di skate pa hóbennan. Esei ta un problema. Awor aki hopi mucha ta kore baiskel riba kaya anochi, sin lus i hopi peligroso. Esei ta nifiká sinta warda  desgrasianan grandi sosodé. Fuera di esei nan ta kologá rònt den barionan loke ta okashoná  molèster,” e ta bisa. “Si bo tin un parke, nan tur ta bai einan. Esnan ku ta riba ‘skate’, esnan ku ta kore baiskel, tur hende. Mi ta mira un solushon pa diferente problema.”

Martines a ofresé ayudo

Martines, ku su mes tin kasi 140.000 siguidó riba Instagram i na Boneiru ta bon mirá riba tereno di BMX, kore motor i kuat, tin tambe un antesedente den ingeneria. Ku e antesedente aki el a entregá den pasado un diseño detayá pa realisá un parke di ‘skate’. Te ku awor sin resultado. “E idea aki t’ei kaba pa mas ku 10 aña. Mi a sinta ku hopi kompania i gobièrnu, pero nada no a sosodé,” e ta konta desepshoná.

Lugá seif pa mucha

E ta enfatisá kon un parke di ‘skate’ lo no mehorá e seguridat so, pero tambe lo inspirá i motivá e hubentut di Boneiru. “Tin hopi mucha ku ta kore baiskel akinan. Por sigui desaroyá talento pa BMX. Tambe un parke por brinda un lugá seif kaminda e muchanan por desaroyá nan talentonan,” e ta splika.

Martines ta aktivamente enbolbí tambe den otro deporte, manera tènis di bich. Tambe e ta traha fultaim na kadaster. Apesar di su skema drùk na edat di 31 aña e ta keda pèrsiguí su pashon pa akrobasia i kore baiskel. “Mi ta purba semper di inventá kosnan nobo. Riba BMX, motor i kuat. Riba kama na kas mi ta drumi pensa kiko mi por trese nobo,” e ta bisa.

Regata Boneiru

Ku regata di Boneiru na bista Martines ta spera di duna un show spektakular. “Mi ke duna un bunita show na Boneiru. Mi ta spera ku esei ta inspirá nan pa uza baiskel mas biaha i trein,” e ta kompartí.