KRALENDIJK – E kantidat di habitante di Boneiru ku ta sufri di demensia lo multipliká ku sinku den transkurso di e 25 añanan benidero; di 250 persona awor te alrededor di 1200 den aña 2050. Fundashon Alzheimer Bonaire (FAB), ku ta lucha pa e interesnan di esnan ku ta sufri di demensia, ta atvertí pa esaki. 

For di un enkuesta mundial di e malesa, ku London School of Economics and Political Science (LSE) a realisá, a sali mas datonan preukupante tokante e malesa.

For di e Rapòrt di Alzheimer Mundial 2024 ta sali na kla ku e stegma (un konvikshon negativo i hopi biaha inhustu) rondó di demensia ta oumentá, asta bou di profeshonalnan den kuido. Ta resultá ku no menos ku 80% di e públiko ta pensa eróneamente ku demensia ta un parti normal di bira bieu, loke por kondusí na diagnóstiko redusí i akseso limitá pa tratamentu i kuido.

Tambe personanan ku demensia ta eksperensiá mas i mas stegma; 88% ta duna di konosé di tin di haber ku esaki. Esaki ta kontribuí na isolashon sosial, ya ku hopi ta evitá situashonnan sosial i trabou.

Apesar di e estadístikanan preukupante i e resultadonan relatívamente negativo di e enkuesta ku LSE a hasi, por papia di  adelanto tambe riba sierto puntonan: Mas hende ta sinti nan mas sigur pa atendé ku e stegma i ta rekonosé e influensia di estilo di bida komo riesgo pa desaroyá demensia.

Eskases di entrenamentu 

Un di e konklushonnan mas importante di e rapòrt ta ku erornan i falta di entrenamentu bou di profeshonalnan den kuido ta keda forma problemanan grandi. Pasobra esaki por kondusí na diagnóstikonan robes i kuido inadekuá.