KRALENDIJK – Un kantidat di irregularidat serio i fundamental a kondusí na seramentu di forma inmediato di e akohida di mucha Happy Kids, Happy Days. Mayornan di e muchanan a ser informá djarason atardi  pa funshonario di Entidat Públiko Boneiru (EPB), tokante e desishon drástiko.

E muchanan ku tabata bai  Happy Kids, Happy Days mientrastantu di forma tentativo a wòrdu repartí entre otro fasilidat di akohida di mucha. 

Diputado Nina den Heyer, riba pregunta di ABC Online Media a bisa ku e medidanan ta basá riba rapòrtnan krítiko di Inspekshon di Enseñansa. “Anteriormente ya a konstatá ku tabata tin sierto defisiensa serio, loke a kondusí na un seramentu temporal algún tempu atrás, pero awor aki no por a sigui mas”.

E seramentu di forma inmediato i definitivo tin su base tambe den e echo ku inspekshon no a mira adelanto òf speransa pa un adelanto drástiko después di diferente inspekshon ku a hasi. “No tin e konfiansa ku e situashon lo mehorá, i komo gobièrnu, nos mester a tuma nos responsabilidat,” segun Den Heyer a splika.