KRALENDIJK – E popular Kareda di Regata na Boneiru, un evento di pusta kore ku ta tuma lugá tur aña den òktober, ta selebrá e aña aki su di 40 edishon. Norison Conquet, organisadó di e kompetensia, ta konta entusiasmá di e orígen i e meta di e kareda i ta antisipá riba e aña di hubileo. Ta organisá e kareda di regata e aña aki riba djarason 9 di òktober.

“A lanta Comcabon na 1984,” Conquet ta kuminsá. “E meta di nos organisashon tabata i ta pa haña mas tantu hende den moveshon. Organisá kompetensianan di pusta kore ta nos enfoke mas importante.” E Kareda di Regata ta huntu ku e kompetensia di San Silvestre i algun otro evento ku nos ta organisá huntu ku Indebon, un di e kosnan mas importante ku nos ta organisá.”

Partisipashon kresiente 

Aña pasá tabatin 25 pa 26 partisipante na e Kareda di Regata. Pa e edishon spesial aki Conquet ta fèrwagt ku e kantidat lo subi te 50 òf 60 partisipante. “E ta pa tantu mucha komo adulto,” e ta splika. “E último añanan nos ta mira mas i mas partisipantenan di diferente kultura. Por ehèmpel ta partisipá na e evento Polako, Hulandes, Latino i naturalmente partisipantenan lokal. Mas tantu hende, mas plasentero.”

E ruta pa mucha ta dos kilometer largu, ku un start na stadion. E kareda ta dos kilometer i ta pasa dilanti sitionan konosí manera pòstkantor, Altagracia Grill i ta kaba na Karels Beach. Adultonan ta kore un ruta mas largu ku ta hiba nan Kaya Grandi i Between2Buns. E ruta aki ta sinku kilometer.

Siguridat di e kareda 

Conquet ta enfatisá ku a pensa riba siguridat: “E start ta 5.30 atardi i polis ta presente pa guia e tráfiko. Boluntarionan ta yuda tambe pa indiká e ruta na e koredónan. No ta sera Kaya Grandi e atardi ei, pero ta kontrolá e tráfiko si.”

“Partisipantenan no por inskribí onlain ainda pa e edishon aki,” segun Conquet. “Mester inskribí na Karels Bar. Nos ta trahando pa regla esaki otro manera den futuro.” Pa sinku dòler partisipantenan ta haña un shirt di regata ofisial, i pa muchanan e partisipashon ta gratis. Por inskribí djasabra òf djaluna benidero.