KRALENDIJK – Riba 27 di ougùstùs Bonaire.nu a anunsiá ku diputado Cicilia ta buskando un solushon struktural pa e seru di sushi, ku riba e isla ta konosí komo lèntfel o sea kuskus.  Relashoná ku esaki mi tin e siguiente reakshon.

Kayente ta okashoná e kandelanan di lèntfel aki. Kalentamentu global ta okashoná kayente i esei ta kondusí na inflamashon espontaneo den suela. No por hasi nada kontra esei. I pasobra nos no sa kiko tur tin den suela di lèntfel kada kandela den potensia ta un peliger pa salubridat públiko. Kombatimentu di e kandelanan pa medio di plama diabas riba dje ta un aparente solushon temporal, pasobra e kandelanan ta lanta kada biaha di nobo pa motibu di e  kayente ei.

For di luna di mei di e aña aki diputado Cicilia ta buskando un solushon struktural. Bon señora Cicilia, e t’ei i ta konsistí di dos parti. Na promé lugá mester bini un instalashon di prosesamentu di residuo, di moda ku por stòp ku e bashamentu di sushi na lèntfel. Un posibel sitio pa un instalashon asina ta e anterior tereno di BOPEC. E parti aki di e solushon ta surpasá e posibilidatnan finansiero di e isla, pero no tin e ekspertonan nesesario tampoko aki nan. Ámbos lo mester bini anto di Hulanda Europeo. Einan tin mas di e tipo di plantanan di prosesamentu aki.

E di dos parti di e solushon ta ku mester sanea e lèntfel. Pasobra e kayente i e kandelanan ta sigui normal e desenionan binidero si e lèntfel ta keda den e posishon manera e ta awor aki. Pa esei tambe mester di ekspertisia di otro kaminda. Tur otro solushon no ta solushon, sino mas un fantasia. I no ta eliminá e peligernan pa salubridat públiko.

Kisas un koperashon ku Aruba i Kòrsou por ta posibel pa e solushon struktural, pasobra einan tambe nan ta lidia ku e mésun problema. E pir t’ei kaba na BOPEC kaminda e barkunan ku residuo por mara.

René Roders