ORANJESTAD – A restorá i transformá e kas di Pepe Margo na Wilhelminastraat den un destileria artesanal di ròm. A restorá e kushina estilo Arubiano den su estado original. 

Empresario Jonathan Harms despues a transformá e kushina den un destileria di ròm i a duna su ròm e nòmber ‘Pepe Margo’ na honor di defuntu Margo Wever, ku un tempu tabata doño i tambe tabata madrina di su tata, Milton Harms.

Asina a skapa e kas Arubiano pa e no kai den dekadensia i awor tin un atrakshon turístiko mas pa mira di aserka kon ta produsí ròm Arubiano.

Bibida Calypso 

Jonathan Harms ta tambe promotor di produkshon di Calypso, e promé bibida di soda ku ta produsí na Aruba den kuater sabor.

Jonathan a transformá e depósito, kaminda  famia Harms a start nan empresa hopi desenia pasá, den un fasilidat moderno pa produsí bibida alkohóliko ku ta kontené gas.

A yama e bibida di soda Calypso Hard Seltzer i e tin sinku porshento di alkohòl. E diseño moderno di e blekinan ta entre otro e faro California i ta optenibel den e sabornan Tangerine, Berry mix, Lime & Ginger i Mango.