WILLEMSTAD – Djabièrnè último wes a sentensiá sinku empresario di diferente empresa na kastigunan di prison kondishonal ku ta varia di dos pa kuater luna, ku un periodo di prueba di tres aña. E sentensianan aki ta konsekuensia di no a entregá deklarashonnan di impuesto di ganashi pa vários aña.

Korte a disidí ku e indivíduonan aki mester entregá dentro di un término stipulá tur nan deklarashonnan fiskal atrasá, inkluso pa e periodonan pa kua nan a risibí un balotashon di deklarashon di impuesto kaba.

Durante e periodo di prueba nan mester pèrkurá tambe pa den futuro entregá tur deklarashon na tempu i paga e impuestonan korespondiente. Si nan tene nan mes na e kondishonnan aki, nan lo no mester bai prison.

Durante e kaso den korte a sali na kla ku algun di e kompanianan enbolbí a akumulá debenan di impuesto konsiderabel ku ta varia di 100.000 florin te mas ku 1.5 mion florin.

Relashoná ku deklarashonnan resien di minister di Finansas tokante privilegionan fiskal, Ministerio Públiko a eksigí ku e debenan aki mester ta pagá dentro di e periodo di prueba.

Pero wes a disidií ku e akusadonan mester drenta un areglo ku Ontvanger riba término korto i nan mester tene nan mes na e areglo aki. Segun e wes eventual problemanan ku Ontvanger ta kai bou di responsabildat di minister pa solushoná. 

E akusadonan a duna di konosé di ke tene nan mes na e kondishonnan, pero ta ekspresá nan preukupashon pa e potensial  konsekuensianan di un registro di kastigu di prison pa biahenan internashonal, partikularmente pa Estados Unido.

Pa e último dos kasonan e abogadonan di e sospechosonan a entregá un defensa tékniko, i Ministerio Públiko a presentá opheshon. Korte lo dikta sentensia den e kasonan aki 20 di mart.