Kralendijk – Huntu bo sa mas ku ora bo ta bo so. A base di e punto di bista aki e institutonan di kuido Kennemerhart di Haarlem, Hulanda i Fundashon Mariadal di Boneiru a firma un akuerdo di koperashon den kuadro di Het Lerend Netwerk, un Ret di Konosementu i Eksperensia.

E koperashon entre Kennemerhart i Fundashon Mariadal ta enfoká riba un interkambio di informashon mutuo i aktivo, siña di otro i inovashon pa medio di por ehèmpel hasi bishita (via skype), konsulta i intervishon. Esaki ku e meta pa mehorá kalidat di e kuido ku nan ta duna na hende grandi i hasi esaki sólido pa futuro.

Den ámbos organisashon kuido di hende grandi ta para dilanti di desafionan grandi, manera skarsedat riba merkado laboral i e demanda pa kuido ku ta kresiendo i kambiando. Núkleo di e Ret di Konosementu i Eksperensia ta ku ámbos organisashon ta siña di otro. Netamente den tempu di corona. Pa tur kas di kuido esaki ta un periodo difísil ku malesa i fayesimentu di klientenan, medidanan restriktivo i empleadonan sobrekargá. Siña di otro su aserkamentu i kompartí protokòl i eksperensia. Esaki por ta hopi útil, pero e ta duna sosten tambe i e ta inspirativo.

Dirigentenan

Giovanni Frans, dirigente di Fundashon Mariadal, ta bisa ku e ta kontentu ku e koperashon. ‘Na kada banda di oséano ta aserká sierto asuntunan di un otro sistema i kosnan ta tuma lugá na nèt un otro manera. Netamente den esei nos por enkontrá nos partinan fuerte i uni forsa pa por duna mihó kuido pa medio di interkambio di konosementu i informashon.’

‘Nos ta siña di otro’,segun Audrey van Schaik, presidente di e Hunta di Direktiva di Kennemerhart. ‘Na momentu ku mi a bai den kòmbersashon ku empleadonan i klientenan di kuido di hende grandi na Boneiru, mi a eksperensiá kon na un isla ku un kultura di famia, hende grandi por ta di gran importansia. Tin hopi rèspèt pa hende grandi i keda kuida otro ta un kustumber na Boneiru.’

Organisashon

Fundashon Mariadal ta aspirá un ekilibrio optimal pa loke ta trata enfoke riba pashent i kliente i profeshonalismo. E aserkamentu personal, ku ta spesífiko pa Boneiru, ta sentral den esaki. Banda di esei inovashon ku un karakter insular ta importante den desaroyo kontinuo di e organisashon. Kolaborashon ku sentronan di salú i konosementu, manera Kennemerhart, ta nifiká un balor agregá grandi pa desaroyo mas aleu di un aserkamentu integral di kuido di hende grandi.

Kennemerhart ta un di e institutonan ku a pone e base pa fasilidat di biba riba eskala chikitu pa klientenan ku demensia i ta ofresé konosementu spesialisá pa hende grandi. ‘Nos kalidat i ekspertisio di nos empleadonan ta na un nivel haltu, loke gustosamente nos ke kompartí ku otronan’, segun van Schaik. 

---

Lesa tambe:

• 
  Fundashon Across The Isles ta bai kordiná  aktividat rondo di  historia di sklabitut na Boneiru
• 
  Tayer skibi buki pa mucha tokante herensia kultural, tabata un gran éksito
• 
  Fondo Nasional di Restorashon ta duna un fiansa pa restorashon di The Old Gin House na Sint-Eustatius
• 
  Kampaña nobo ‘You’ve got the power’ a ranka sali na Boneiru
• 
  Thuersten Winklaar ta bringa pa e título di Kampion Hulandes na Den Haag