KRALENDIJK – Dia di Boneiru 2024 ta serka di ranka sali. Riba 6 di sèptèmber lo organisá hopi aktividat den área di Playa. Durante e dia di fiesta ofisial hopi habitante di e isla lo organisá i asistí na hopi festividat. Lesa aki e kosnan mas importante ku bo mester sa di e evento.

Kiko ta Dia di Boneiru?

Na Hulandes ta yama Dia di Boneiru tambe Dia di Bonaire òf Bonairedag. Kada aña riba 6 di sèptèmber ta organisá e evento aki. Dia di Boneiru ta konosí tambe komo Dia di bandera. Den e fase preparatorio di e evento por ripará esei bon. Hopi outo ta kore rònt riba e isla ku un bandera di Boneiru. Tambe tur rotònde ta dòrná e aña aki ku bandera. Dia di Boneiru ta un dia di fiesta ofisial, kaminda ta para ketu na ‘deskubrimentu’ di e isla. Esei a sosodé na 1499 ora e Spañó Alonso de Ojeda i e Italiano Amerigo Vespucci a yega e isla pa promé biaha.

Unda ta organisá e aktividatnan e aña aki?

Ta selebrá Dia di Boneiru na diferente sitio. Tur festividat ta tuma lugá den Playa, e sentro di Kralendijk. Lo organisá mayoria aktividat den Parke Wilhelmina, Plaza Oraño i e sitio pa stashoná outo di e edifisio di Kolegio Ehekutivo.

Kon e programa ta?

E tema di Dia di Boneiru e aña aki ta: ‘Un Boneiru limpi. Nos deber, nos orguyo’. E programa ta parse di ta un tiki mas ámplio e aña aki. E antesala ta inisiá 5 di sèptèmber. E ta kuminsá 6’or di atardi i ta tuma lugá riba e sitio di stashoná outo di e edifisio di Kolegio Ehekutivo, den Parke Wilhelmina i riba Plaza Oraño. Henter anochi tin un programa ku diferente grupo musikal ku ta toka músika krioyo. Pa 12’or di anochi tin un show di vürwèrk.

Riba dia 6 di sèptèmber por pone e wèker tempran. E dia ta kuminsá mitar di ocho di mainta ku e seremonianan ofisial. E aktual gezaghebber John Soliano lo bai tene pa di promé biaha un diskurso riba Dia di Boneiru. For di 12’or por disfrutá den Parke Wilhelmina di aktividatnan kultural. Tin stènt di kuminda i kos di bebe. Tambe tin gruponan di baile i dj-nan. Lo selebrá Dia di Boneiru henter anochi. Mitar di tres di madrugá lo para muzik.

Tin buelo ainda disponibel di Aruba/Kòrsou pa Boneiru?

Ounke ku ta parse ku no tin hopi pasashi mas disponibel, Dividivi Air, Winair i Z Air tin lugá ainda riba 5 i 6 di sèptèmber pa yega Boneiru for di Kòrsou i Aruba.