Kralendijk – Djabièrne pasá a pone nuebe klikonan pintá di e Sushi òf Dushi Kliko Challenge na Queens Highway, konosí komo e ruta di turista. For di awor komunidat di Boneiru i turistanan por depositá nan sushi den e obranan di arte di kliko aki.

E Sushi òf Dushi Kliko Challenge tabata un proyekto ku a tuma lugá den òktober 2021 pa hasi hóben i adulto mas konsiente di e importansia pa kuida nos naturalesa. Studiantenan a pinta e klikonan bou di guia di artistanan lokal. E hóbennan i MBO Bonaire a gana un premio pa e klikonan mas bunita.  

Promé ku a pone e klikonan na e ruta di turista, Stacey Mac Donald, bosero di Wereld Natuur Fonds, a duna un spich. Deputado James Kroon tambe a kompartí un par di palabra ku e invitadónan kual tabata konsistí di representantenan di partnernan i spònsernan. “E tipo di proyektonan aki ta un ehèmpel pa Boneiru. Dor di traha huntu nos por krea un futuro bunita pa nos isla.”, segun deputado Kroon. 

Un representante di Caribbean Homes a duna e gran premio di e Sushi òf Dushi Kliko Challenge na Lisette de Keijzer, direktora di MBO Bonaire. A finalisá e evento aki ku un mini-clean up kual deputado Kroon tambe a partisipá den dje. 

Wereld Natuur Fonds

E Sushi òf Dushi Kliko Challenge tabata un inisiativa di Wereld Natuur Fonds, Entidat Públiko di Boneiru i Selibon N.V. den kolaborashon di Tourism Corporation Bonaire, STINAPA i Fundashon Plataforma Kultural. Caribbean Homes tabata e spònser prinsipal di e proyekto aki i Krioyo Paints a spònser e materialnan ku tabata mester pa e pintamentu. Salty Tours Bonaire i Caribbe Watersport Bonaire tambe a duna premionan.