KRALENDIJK- Kolegio ehekutivo a haña solushon pa e konflikto ku a lanta entre diputadonan Thielman i Den Heyer di MPB na un banda, i James Kroon (UPB) na otro banda. 

Gezaghèber Edision Rijna tambe a haña su mes partido den e konflikto, ora ela vota huntu ku Kroon pro ortogamentu di e permit di konstrukshon di Sunset Beach Resort, manera esaki ta riba mes. Thielman i Den Heyer tabata redondamente kontra di esaki. 

Pa por sali for di e impase, partidonan a skohe pa bai un trayekto di mediashon, ku a kuminsa algun siman pasá. Den konferensia di prensa djarason atardi, gezaghèber Rijna a indiká ku e proseso a resultá eksitoso i ku partidonan a logra haña otro. 

Detaye

“Mi no por duna detaye ainda, pasombra mester kaba di studia algun punto i konkretisá esakinan”, asina Rijna a bisa. Rijna a primintí sin embargo ku asina ku tur kos ta kla, Kolegio Ehekutivo lo sali pafó ku e detayenan. 

Lastimamente, ainda no ta kla kiko a palabra konkretamente i kua di e partidonan a basa kuantu awa den e biña i finalmente kiko esaki lo nifiká pa e proyekto en kestion.