Kralendijk – Diputado Den Heyer i e diputadonan di salubridat di Sint Eustatius i Saba ta papia 26 i 27 di sèptèmber ku siudadanonan riba nan isla tokante kehonan den salubridat.

Ta tene e kòmbersashonnan ku ta karga e nòmber “Konta mi” riba 26 di sèptèmber 2024 di 6’or di atardi pa 9’or di anochi na Jong Bonaire na Playa i riba 27 di sèptèmber 2024 di 6’or di atardi pa 9’or di anochi na Cocari na Rincon. E meta ta pa inventarisá ki tipo di keho tin. E islanan BES ta informá ministerio di Salubridat, Bienestar i Deporte, VWS, mas despues tokante e resultadonan. Diputadonan Clark Abraham i Anjelica Cicilia ta presente na “Konta mi” tokante kuido.

E tres diputadonan di e islanan BES a disidí pa kompilá e kehonan di siudadanonan riba nan isla. “Nos sa ku siudadanonan tin keho, pero te ku awor tiki hende ta denunsiá un keho serka e organisashonnan den kuido. Si nos ke mehorá kuido riba e islanan, nos mester demostrá VWS loke ta bai robes i unda esei ta sosodé. Nos ke tende di e siudadano mes unda nan ta topa òf a topa problema,” Den Heyer ta bisa.

E diputadonan di kuido di e islanan BES tin algun tempu kaba ta traha huntu. Na luna di òktober 2023 konseho insular di Boneiru a aseptá un moshon pa laga hasi un investigashon riba e isla tokante kalidat den kuido. Den Heyer ta spera ku e kòmbersashon ku siudadanonan ta duna un bista di e problema- i posibel solushonnan den kuido.

 Registrá 

Siudadanonan por registrá via [email protected] pa partisipá na “Konta mi” tokante kuido. Na momento di registrá nan mester duna nan nòmber i bisa riba kua área di kuido nan tin un keho.