KRALENDIJK– Djabièrne 23 di sèptèmber Kolegio Ehekutivo a ofresé tres dokumento, ku den promé instante tabata konfidenshal, un biaha mas na Konseho Insular.

Ta trata di e ‘Quick Scan’ relashoná ku Bonaire Laboratorium NV, e Akuerdo di Desaroyo Sunset Beach Resort i e rapòrt di e investigashon tokante e rotònde na Kaya Amsterdam. E desishon di partidonan di koalishon di mantené e rapòrtnan en kestion konfidensial a lanta un ola di krítika na Boneiru, kaminda hopi hende a mira e konfidensialidat komo un manera pa tende tapá loke a bai robes den tur tres e kasonan.

“E motibu ku a tene e rapòrtnan konfidenshal, ta pa motibu ku nan tabata kontené nòmber di personanan privá i informashon di empresa, ku pa lei mester protehá. Entretantu a anonimisá e informashon privá. Asina Kolegio Ehekutivo por kompartí e dokumentonan di un forma ku por atendé e kontenido den Konseho Insular”, asina BC a skibi djadumingu den un komunikado pa prensa.

Segun Kolegio Ehekutivo ta bisa den nan komunikado, nan ta para pa loke nan ta yama un ‘gobernashon transparente i semper ta dispuesto pa kompartí informashon i desishonnan ku a tuma ku públiko’. “Di otro banda, Gobièrnu tin ku tene su mes sí na reglanan vigente i tin e obligashon pa sòru ku no ta violá derecho i privasidat di otronan”, asina e deklarason di BC ta terminá.