KRALENDIJK – Fundashon Alzheimer Bonaire a kontinuá ku su aktividatnan den sèptèmber, den kuadro di e luna aki, Luna Mundial di Alzheimer. Djabièrnè i djasabra último tabatin presentashon di e Komedia “Ta brueria òf Alzheimer“ dediká na honor di zùster Annie Thode (QEPD).

Zùster Annie tabata un boluntario di Fundashon Alzheimer ku den pasado a hunga un ròl hopi importante den e Komedia aki. E presentashon djabièrnè tabata na Rincon na Posada Para Mira i djasabra na Jeugdhuis Jong Bonaire i pa ámbos presentashon tur karchi a kaba, pues sala yen yen i pa únikamente $ 5.00 pa por a kubri sierto gastunan, komo ku tur e aktornan tabata boluntarionan di FAB, miéntras ku tantu Posada Para Mira komo Jong Bonaire a pone nan fasilidatnan gratuítamente na disposishon di nos Fundashon pa por a promové e bon kousa aki, esta di konsientisashon di nos pueblo.

E aktornan a demonstrá ku Bonaire ta disponé di sufisiente talento i ku tin hopi mas persona ku ta dispuesto pa duna un kontribushon na nos komunidat pa yuda nan próhimo ku ta biba ku demensia i nan famia. E proseso di konsientisashon a resaltá bon kla durante e presentashon, sigur ora mira kuantu kòmplimènt i komentario tabatin di presentenan despues i tambe rekomendashon pa ku fuera di e anochinan di informashon i pelíkula, si ta posibel pa bini ku mas dje presentashonnan asina ku lo ta algu hopi bon.

Orguyoso

Direktiva di FAB ta bisa di ta sumamente orguyoso ku e aktuashon asina perfekto di e boluntarionan i ta agradesido tambe na nan pa e energia i tempu liber ku nan a dediká pa entrená pa e presentashonnan.

Direktiva a bisa tambe tin hopi apresio tambe pa Directie di Zorg en Welzijn Groep pa nan bon koperashon pa por a realisá e proyekto aki.

Riba e potrѐt por mira e artistanan despues di nan presentashon djasabra anochi