Kralendijk – For di Inspekshon Kuido di Salú i Hubentut (Inspectie Gezondheidszorg en Jeugd – IGJ) a drenta e informe ku posibelmente sierto lotenan di vários remedi ‘Sartaan’ lo por ta kontaminá. Pa e motibu akí komo prekoushon a disidí pa yama e lotenan akí bèk. Ta preskribí ‘Sartaan’ kontra preshon haltu i insufisiensia kardiako. Akí bou bo ta haña un lista di e remedinan en kestion. Ta importante pa partisipá ku no tin niun riesgo direkto pa pashèntnan.

A menshoná lote di e produktonan akí den e akshon di yama bèk, pero no a entregá nan via botikanan di Fundashon Mariadal:

–              Diovan                 – Exforge HCT

–              Co-Diovan           – Hyzaar and Entresto

–              Copalia                – Valsartan HCT

–              Cozaar                 – Aprovel

–              Entresto              – Irbesartan

–              Exforge

A menshoná sierto lotenan di e produktonan akí den e akshon di yama bèk i a entregá nan via botikanan di Fundashon Mariadal:

–              Irbesartan HCT

–              Losartan

–              Losartan HCT

–              Valsartan

–              CoAprovel

E botikanan a saka tur remedi kontaminá for di nan rèkinan.

Kiko bo tin ku hasi awor?

Na e momentu akí bo no tin mester di hasi nada ainda. Aworakí nos ta investigá informashon di tur pashènt i nos ta kontrolá si posibelmente nan a risibí un produkto kontaminá. Si esaki ta e kaso nos lo tuma kontakto ku e dòkter ku a preskribí e remedi pa papia tokante un alternativa òf sustitushon. Seguidamente bo dòkter di kas òf botika lo tuma kontakto ku bo. E ora ei bo por buska un remedi nobo na botika i entregá e remedí enbolbí.

Den kaso ku komo no-residente tambe bo ta hasi uso di e produktonan riba e lista, e ora ei bo mes por buska informashon tokante esaki via https://www.igj.nl/publicaties/publicaties/2021/07/13/productoverzicht-sartanen-juli-2021  

Mas aleu bo por tuma kontakto tambe ku bo propio botika òf e botika general pa investigá si bo remedi tambe ta kai bou di e lotenan afektá. Si esaki ta e kaso bo por laga preskribí un resèpt lokalmente pa haña un sustitushon.

Den kaso ku bo remedi i/òf number di lote no ta riba e lista di e akshon di yama bèk, e ora ei bo no tin mester di remplasá bo remedi. Si bo tin duda bo por tuma kontakto sin kompromiso ku bo botika, pero nos ta konsehá bo pa no bini botika, a ménos ku nan a yama bo pa hasi esaki.   

---

Lesa tambe:

• 
  Partnernan di CAO pa Islanan BES a topa pa deliberá riba desaroyo 
• 
  Prevení Zika, Dengue i Chikungunya
• 
  Organisashonnan Karibe Hulandes ta traha huntu pa preveni violensia kontra hende muhé
• 
  Sindikalismo na Boneiru parti 47, 25 di novèmber 2024
• 
  Curoil ta hasi su mes kulpabel na komportamentu sin rèspèt, pero gobièrnu ta tolerá esei