WILLEMSTAD – Koninklijk Instituut voor de Tropen (KIT)  ta lansa  den su edifisio na Mauritskade na Amsterdam ‘Getuige in Steen’, un gira ònlain di e pasado kolonial.

E edifisio di KIT, un monumento di reino ku a habri na 1926 komo establesimentu di e Instituto Kolonial, ta bunita dekorá. Den un rekorido virtual rondó di djeskuater dekorashon markante, e gira ònlain ta deskribí e pasado kolonial di e edifisio.

E gira ta ofresé tambe komentario visual kontemporáneo di e artista Brian Elstak, ku ta reakshoná den djeskuater ilustrashon riba e dekorashonnan.

Ofresiendo e gira ònlain, KIT ke duna mas tantu hende posibel e posibilidat pa sera konosí ku e historia kolonial di e edifisio. E rekorido virtual ta mustra ademas partinan di e edifisio ku normalmente no ta atmisibel pa públiko.

Museo tropikal 

‘Getuige in Steen’ ta un publikashon di KIT i e Museo Tropikal, ku ta ubiká den e edifisio mes.

E dekorashonnan ku por mira ta entre otro pòtrètnan di Jan Pieterszoon Coen. E pintura di muraya ‘Het Westen, Het Oosten, De Samenwerking’ ta un kolekshon di muestra di sentenares sorto di palu tropikal di e departamentu anterior Handel. E karikatura di piedra ‘De Eerste Schipvaart’ tokante e biahe pa Java na 1595 di  komersiante Cornelis de Houtman, ku a kondusí na lantamentu di VOC na 1602.

“E trabou ku nos komo KIT i e mientrastantu 1500 usuarionan di e edifisio ta hasi na inklushon sosial i durabilidat, ta pará leu for di e pensamentu kolonial ku ta ilustrá den e dekorashonnan den i rondó di nos edifisio”, Mark Schneiders, ku ta CEO di KIT ta bisa.

“Tòg mi ta haña importante pa para ketu na e orígen i nifikashon di e storianan ku ta rondoná nos. KIT ta mira komo parti di su mishon pa no solamente mantené e monumento di reino aki bon, pero tambe pa habri e pasado kolonial ku ta sigui biba den nos edifisio i duna oportunidat pa otro storia enbes di solamente e historia nashonal glorioso ku e fundadónan di e Instituto Kolonial ke propagá”.