WILLEMSTAD – Desde luna di yanüari di e aña aki KHN  tin un propio departamentu na Kòrsou. E asosiashon komersial ta ofresé su ekspertisia na empresarionan di horeca na Kòrsou. KHN ta traha pa un klima di invershon optimal pa horeca riba e isla i pa profeshonalisá e sektor aki.

E departamentu ku empresarionan di Kòrsou ta partner di kombersashon serka gobièrnu. Asina KHN a pone tur su atenshon e último lunanan riba un proposishon di lei di produktonan biodegradabel den horeca ku e partido MAN ta preparando na e momentu aki.

Empake ku plèstik pa un solo uzo ta un daño  pa medioambiente i horeca mester duna un kontribushon pa redusí e shushi aki. E empresarionan ta dispuesto, pero ta haña nan konfrontá ku e konsekuensia- i gastunan di otro material di empake.

Tambe KHN ta di opinion ku no ta horeca so mester kargá ku e asuntu aki, pero ku e ta un asuntu ku ta toka henter e isla.

Atrako

Na luna di mart tabatin un konsulta plenario komo konsekuensia di e diferente atrakonan riba turista ku a tuma lugá anteriormente e luna ei. Kuerpo Polisial di Kòrsou (KPC) i diferente stakeholders tabata presente na e reunion. Presidente di KHN, Tarzeno Cirkens, a sinta na mesa na nòmber di Asosiashon di Komersio di Kòrsou (VBC) di kua KHN Kòrsou ta miembro.

For di e reunion aki a sali diferente punto di akshon, manera mas polis riba kaya i instalashon di kamera na sitionan hopi frekuentá, entre otro sitionan di dibertishon kaminda hopi turista ta bini.

Tambe a palabrá ku KPC lo presentá den koperashon ku CTB un plan di akshon pa wak kon sektor privá por finansiá e plannan.