KRALENDIJK – Konsehero Junny Wout di frakshon MPB a entregá preguntanan skirbí na gezaghèber Nolly Oleana tokante e akshonnan supuestamente no-íntegro di lider di PDB alabes diputado Clark Abraham.

E preguntanan ta sigui riba un konferensia di prensa ku a tuma lugá na komienso di siman di e partidonan di oposishon MBP i UPB. E partidonan ta alegá ku Abraham a aktua ku falta di integridat den un transakshon di negoshi, ku ela hasi promé ku el a tuma posishon komo diputado. Den e transakshon aki, Abraham no a kumpli ku entrega di produktonan na Fundashon Mariadal, mientras ku e hospital a hasi un pago inisial. Ademas, despues ku e kaso a bira konosi, a resultá ku e empresa di Abraham ainda tabata bou di formashon i no tabata registrá formalmente ainda.

Pa medio di un set di diesun preguntanan skirbí, Wout awor ta deseá di sa kiko gezaghebber Oleana a hasi relashoná ku e kaso i kon el ta mira e situashon.

Ta notabel for di e preguntanan i remarkenan di Wout ku e konsehal no ta parse di komprondé, ku tin un diferensia entre un sentensia den un kaso sivil i un konvikshon penal. Abraham resientemente a pèrdè un kaso sivil ku Fundashon Mariadal a kuminsá kontra di dje, pero esaki no tin nada di haber ku e un proseso penla, ni ta indiká ku aktonan kastigabel lo a tuma lugá den e proseso. 

Paga bèk

Abraham, na su turno, ta mantené ku e kaso ta relashoná ku un asuntu di negoshi for di promé ku el a bira deputdo, i el lo kumpli ku e desishon hudisial. Abraham ta kere ku esaki ta sera e kaso.