KRALENDIJK- E úniko miembro di Konseho Insular pa Movimentu di Pueblo Boneriano (MPB) ta aparentemente ta kere ku no tin nada malu den kompartimentu di dokumentunan konfidensial di Konseho Insular, manera e ta haña ta bon. Al kontrario, Wout a laga sa ku e ta di opinion ku esaki ta  su tarea komo representante di pueblo.

E posishon remarkabel di parti di Wout a bini dilanti djaluna den e programa ‘Tra’i Notisia’, presentá pa Norwin (Nòchi) Willem. Ora a papia di deliberashonan den Konseho Insular tras di porta será pa papia tokante posishon di rat riba kambionan den e WolBES i FinBES, Wout a bisa ku e ta konsiderá su tarea pa -den konteksto di transparensia- kompartí informashon konfidenshal ku pueblo. 

Ounke Willem den e programa a trata di frena Wout un poko, sugeriendo ku sakamentu di dokumentunan konfidensial lo por ta asta un akto kastigabel, Wout no ker a bèk, pero al kontrario keda persistí riba su punto. 

Embargo

E konsehal ku pa motibu di su preguntanan tin biaha straño, òf komentarionan na puntonan di agènda robes no ta mustra su mes komo esun mas briyante, despues a mustra ku e no sa kiko e palabra ‘embargo’ ta nifiká, pa loke ta trata di dokumentunan ku (ainda) no por wòrdu hasí públiko. “Embargo, kiko esaki ta nifiká?” Wout a puntra Willem, lagando hopi skuchadó i opservadó polítiko un poko babuká.

Rumor i intriga

Den e último dianan aki por ripará ku tin hopi rumor i akusashon ta bai rònt na Boneiru. Esaki entre otro debí na e diskushon tokante e areglo establesé fin di aña pasá pa loke ta prosupuesto pa sostén di frakshon den Konseho Insular.  Ounke ku Wout, huntu ku tur otro konsehal a vota ‘pro’ pa e areglo, despues esaki a bisa ku e propishon a wòrdu kambiá di forma sekreto o manipulativo, na algun momentu den e proseso.  E otro partidonan den Konseho Insular, esta PDB, UPB i M21 a mustra di no ta nesesariamente di akuerdo ku Wout, pa loke ta trata e tema òf akusashon aki.

Tin opservadónan polítiko tambe ku ta kere ku MPB ta buskando manera pa laga Wout hinka su mes den un ‘callejon sin salida’.  Dor di lage e konsehal hinka su mes den un posishon imposibel, lo por eksigí ku Wout ta bandoná Konseho Insular, kreando oportunidat pa remplasá Wout ku otro miembro -talbes mas eksperensiá- di e partido blou.