KRALENDIJK- Gran mayoria di Konseho Insular ta completamente fadá ku e aktitut arogante di Fundashon Mariadal. 

Esaki a sali na kla durante un reunion djaweps atardi di komishon fiho Samenleving & Zorg, kaminda a papia entre otro di a servisio di Ambulans Aéreo ku e konsehal nan a yama defisiente. 

Loke tabata mas krítika riba dje sinembargo, ku konsistentemente Fundashon Mariadal ta nenga di akseptá invitashon di Konseho Insular pa bin duna kuenta i rason pa nan maneho i nan eskohonan. 

Ounke ku, bon mirá, Fundashon Mariadal no ta raportá ni na Kolehio Ehekutivo, ni na Konseho Insular, e konsehalnan ta rabiá pa e forma arogante ku Mariadal ta ninga di akseptá invitashon pa bin duna splikashon riba sierto tópiko. 

Konsehal di M21, Daisy Coffie, a bisa ku a invitá Fundashon Mariadal hopi biaha, pero ku esakinan no ta ni tuma e molèster pa bisa ku nan no por ta presente. 

Konsehal Yona Chirino (UPB) a bisa ku e ta di opinion ku, riba a materia di Ambulans Aéreo mester hasi un intento tòg pa invitá Fundshon Mariadal un biaha mas, pa nan bin duna splikashon di nan maneho. 

No ta bin tòg

Akinan konsehal Junny Wout a pone hinter e sala i tur presente hari, ora ela bisa di forma pashoná: “Pa kiko invitá nan mes? Nan no ta bin tòg!”. 

Na final di e reunion e konsehalnan den e komishon a bai di akuerdo pa invitá Fundashon Mariadal un biaha mas.