KRALENDIJK – Di 5 di yüni te ku 18 di yüni 2023, Konseho Insular ta riba bishita di trabou na Oropa. E biahe ta konsisti di tres parti.

E promé parti di e biahe ta un bishita na e arkipelago autónomo di Åland, kaminda un delegashon di Konsehalnan ta hiba vários kombersashon ku entre otro Gobernador, Konseho di Minister, i miembronan di parlamento. Meta di e bishita aki ta pa haña sa mas di e posishon konstitushonal i struktura estatal ku Åland tin komo parti di e estado di Finlandia, i tambe su relashon ekstraordinario ku Union Europeo.

Despues di e bishita na Åland, Konseho Insular lo asistí na e kongreso anual di Asosashon di Munisipionan Hulandes (VNG), ku lo tuma lugá na Groningen.

Despues di esaki, Konseho Insular lo tin reunionan na Den Haag ku vários mandatario i ministerionan, pero tambe ku Komishon Fiho pa Asuntunan di Reino di Tweede Kamer, i ku Raad van State. 

Tópiko

Tópikonan di interes speshal lo ta entre otro e asuntu di pobresa, minimo sosial, e preokupashon pa ku sierto kambio den Leinan orgániko pa e tres Entidatnan Publiko Karibense (WOLBES i FINBES) ku Gabinete ke proponé na parlamento, salubridat publiko, i medidanan pa defende Boneiru kontra e kambio di klima.