THE BOTTOM- Trabounan di konstrukshon a kuminsá na e hotèl ikóniko di Saba, Scout’s Place. E hotèl algun tempu pasá a wòrdu kumprá pa fondo di penshun Karibe Hulandes (PCN). 

E trabounan ta forma parti di un plan pa yega na rekonstrukshon i ekspanshon di e hotel ku ta situá na Windwardside. Despues di un proseso di pidi oferta, a identifiká un kontratista ku lo bai realisá e transformashon. 

Den promé instante ta kuminsá ku un parti di demolishon, pa por sigui traha riba e plan di konstrukshon i ekspanshon. Mientras partinan importante di e hotèl lo kede konservá, e hotèl lo bira mas grandi i mas luhoso segun plannan ku a wòrdu desaroyá pa PCN pa medio di su kompania Participatiemaatschappij Caribisch Nederland (PMCN).