WILLEMSTAD – Awe ta kuminsá na Kòrsou e kòmbersashonnan entre Kòrsou, Aruba i Hulanda  ku Venezuela riba e reapertura di frontera ku Venezuela. Esaki lo tuma lugá na Acoya Curaçao Resort. E reapertura mester sosodé gradualmente, kaminda lo habri e frontera marítimo promé.

E paisnan lo papia sin Venezuela promé, despues Venezuela ta yega serka. E ta un konsulta tékniko sin gobernantenan aserka ainda. Representantenan di Duana i Servisio di Imigrashon i outoridatnan di Tráfiko aéreo i Tráfiko marítimo si ta presente. Pa Kòrsou ta presente Gerente di Relashonnan Internashonal i pa Aruba e ekivalente Arubiano, Duana, Atministrashon di Aviashon Sivil DCA, Gerente di Transporte marítimo i un representante di gobièrnu Arubiano.

Segun promé minister Gilmar Pisas ta e intenshon pa e frontera habri pronto pa e barkunan Venezolano ku fruta i bèrdura por bini atrobe. El a aklará anteriormente kaba ku e reapertura di frontera no ta solamente importante pa e barkunan ku produktonan fresku pa tene e gastunan haltu di kuminda abou, pero ku e ta krusial tambe pa restablé e tráfiko aéreo ku Venezuela, di manera ku personanan por biaha bai nan pais bèk.

Venezuela a sera fronteranan ku Aruba i Kòrsou na luna di febrüari 2019.