WILLEMSTAD – Kontrolaria General no ta kontentu ku gobièrnu i parlamentu, ku apénas ta dediká atenshon na su rapòrtnan ku el a emití. Esei por lesa den e relato di aña 2021, ku a publiká ayera.

Tantu riba nivel atministrativo komo riba nivel gubernamental no ta risibí tur ora un reakshon promé ku publikashon. Den mayoria kaso ta pidi pa posponé. Remarkabel Kontrolaria General ta haña ku riba nivel gubernamental no ta tur minister involukrá ta reakshoná.

Ministerio di Salubridat Públiko i Ministerio di Finansas por ehèmpel no a reakshoná ètòl riba e investigashon riba eksplotashon duradero di hòspital nobo.

Minister di Tráfiko i Transporte ku ta responsabel pa e pèrdidanan di e rendimentu di Parkeerbeheer no a reakshoná riba e rapòrt konserní di Kontrolaria General.

Parlamentu

Pero e krítika ta mas fuerte riba parlamentu. For di e relato di aña ta sali na kla ku a trata solamente un di e rapòrtnan den Komishon Sentral  i no a trata niun rapòrt den Reunionnan públiko di Staten. Mientras ku Staten ta e organo  kontroladó mas importante den un estado di derecho demokrátiko.

Ta trata e ora ei pa kolmo investigashonnan ku parlamentu mes a pidi, manera por ehèmpel maneho di Consultancy di gobiernu i eksplotashon duradero di hòspital nobo.