WILLEMSTAD – Falta algun kos na ehekushon di e proyekto Supervishon ku kámara di gobièrnu di Kòrsou. Esei Kontrolaria General ta konkluí. Promé no a regla un presupuesto, i despues a surpasá e sèn ku a pone disponibel, mientras no a finalisá e proyekto ainda. 

Den e planifikashon a buta 580 kámara. Lo a realisá e proyekto den kuater fase. Pa fase 1 i 2 a kumpra 474 kámara i den fase 4 lo a kumpra i instalá e sobrá.

E proyekto a keda pegá den fase 2 pa falta di medionan finansiero. A instalá 212 kámara di e 474 ku a kumpra. No tabatin evaluashon i no a alkansá e meta ku a pone dilanti, esta ku tur bario na Kòrsou tin kámara, segun Kontrolaria.

Outonan di polis

E dos kámaranan di tráfiko riba Helmin Wiels Boulevard i djesseis kamera riba outonan di polis tabata forma parti di e proyekto. A konektá ámbos kámaranan di tráfiko riba e ret, pero no ta usa nan pa e loke nan ta destiná p’e ku ta verbalisá i duna but di violashonnan di tráfiko ku a konstatá. Pues nan no ta operashonal.

E kámaranan riba e djesseis outonan di patruya di polis tabata pa sirbi komo medio di vigilansia pero apénas a usa nan komo tal. Parse ku téknikamente tabata posibel pa desaktivá kaptura di imáhennan i algun agente lo a hasi esaki.

Fin di yüni di e aña aki niun di e djesseis kámaranan tabata den servisio: seis outo ta dañá i sinku a deklará total loss. Di e sinku outonan ku a sobra a kita e kámara di tres di nan, un outo no ta usa pa kòntròl i e kámara di un outo ku ta usa ainda pa kòntròl, no ta traha.

Preparashon 

Minster di Hustisia a disidí na aprel 2014 pa kuminsá prepará e proyekto. A stòp kuné prematuro. Na yüni 2014 e empresa Inspur a start ku un proyekto sin ku a traha un planifikashon i sin ku tabata definí kiko e finansas presupuesta tabata pa por ehèmpel e personal, material i sostenibilidat.

Tampoko a hasi un studio profundo di e kantidat i tipo di kámara ku lo bai tin mester i si eseinan téknikamente lo ta adekuá pa konekshon riba e ret di Kòrsou. No tabatin Término di Referensia.

No a averiguá ku kua eksigensia di lei mester kumpli pa vigilansia di kámara efektivo. Kòrsou por ehèmpel no konosé responsabilidat di plachi di number, di manera ku no por usa imáhennan di kámara si no por identifiká e shofùr riba e imáhen. Un plachi di number so no ta sufisiente. 

Ademas ta eksistí un norma mínimo pa protekshon di dato den tur pais di Reino, pues tambe pa Kòrsou. Pa falta di un lei nashonal, manera un régimen di polis, no tin sufisiente garantia pa kumpli ku e mínimo aki na momentu di vigilansia di kámara.

I te na ora ku tin un responsabilidat di plachi di number, lo ta difísil pa duna un but, pasobra no ta obligatorio pa informá na registro sivil kambio di adrès. I no ta tur kas/apartamentu tin un adrès bálido tampoko.