KRALENDIJK – E koperativo di Piskabon ta sinti su mes satisfecho ku e logronan ku a alkansá den transkurso di aña.

Segun e koperativa, esakinan a bira posibel danki na supsidio, donashon i koperashon di entre otro “De Prins Hendrik Stichting”, Gobiernu di Boneiru, Cargill Salt Bonaire B.V. i bon koperashon ku STINAPA Bonaire, WWF Dutch Caribbean i Budget Marine. Diferente proyekto por a wordu realisá durante di e aña ku ta transkuriendo.

E koperativa ta bisa di a logra vários kos importante den transkurso di aña, manera firmamentu di un kontrakt ku Entidat Públiko Boneiru (EPB), habrimentu di un onfisina propio, benta di zeta pa motor na preis redusí pa e miembronan, kominso di un kurso pa hóben i un espasio di trabou na Playa Frans.

2023

Piskabon a ekspresá su gratitut na tur hende ku a kolaborá i aportá na e organisashon durante aña 2022.

Pa aña 2023 Piskabon lo sigi traha pa fortifika peska na Boneiru i ta spera ku e proyekto di e sitio di trabou kaminda piskadó nan por limpia nan piska na Sorobon tambe por ser realisa, por sigi guia mas hoben, realisa e slipway nan na e diferente lokalidat nan i sigi konta ku sosten di su miembresia i partner nan den e sektor di peska.