WILLEMSTAD – Minister Ruisandro Cijntje, ku ta responsabel pa Desaroyo Ekonómiko na Kòrsou, ta tuma akshon pa trese ekspertonan di eksterior pa investigá profundamente suministro di koriente riba e isla.

Despues di e black-out di siman pasá minister Cijntje ta yama e situashon rondó di e fayo “inakseptabel”. El a yama mésora un konseho di minister spesial pa diskutí e problema i buska un solushon permanente.

E fayo di koriente di ayera tabata okashoná pa un korto sirkuito den e sistema di kontrol di e sentral na Mundo Nobo. E korto sirkuito a okashoná un eksploshon, di moda ku un gran parti di e isla tabata te asta seis ora sin koriente.

Segun e minister gerente di e kompania di elektrisidat Aqualectra mester “tuma su responsabilidat”. El a asentuá ku e mes lo tuma su responsabilidat tambe i hasi todo por todo pa haña un solushon.

E black-out di djaweps a kuminsá 6’or di mainta i den  komienso di atardi hopi bario tabatin koriente atrobe. E minister di Desaroyo Ekonómiko  ta asentuá sinembargo ku e fayo den suministro di koriente kontinuamente ta inakseptabel i ku mester bin un solushon konfiabel. Un promé stap den e direkshon ei ta di atraé ekspertonan di eksterior, di moda ku por analisá i enfrentá e motibunan di e black-outnan profundo.