WILLEMSTAD – Kòrsou ta gana final di ABCS di Sürnam. Durante tempu adishonal e ekipo di Remko Bicentini tabata pèrdí ku 2-1. Faltando algun minüt tabata parse ku Sürnam lo a bai ku e premio máksimo, te na momentu ku rèfri  a konsedé un pinalti pa Kòrsou pa un handsbal riba instrukshon di su asistente.

E hungadónan di Sürnam a oponé fuertemente kontra e desishon aki ku segun nan tabata inhustu. Kòrsou a empatá e wega ku 2-2 i despues rèfri a flùit final mésora. Den e seri di pinalti e isleñonan a sali di bon i ku esaki a prolongá e título ABCS.

Sürnam

“Ta un pèrdida doloroso. Un kampionato asina bo no ke laga pasa bai. El a afektá henter e grupo”, entrenadó Roberto Gödeken ta bisa.

E tim a lucha hopi duru pa logra su mishon (bira kampion). E mishon a kuminsá bunita ku un viktoria di 4-1 di Sürnam riba Boneiru, pero a kaba dos dia despues den un esfera deprimí. “Ora bo traha duru bo ke haña un rekompensa anto ta hasi doló si e mester sosodé di e manera aki.”

Sürnam a hunga bon den e promé mitar, pero no a hasi uso di e oportunidatnan pa hinka gol. Despues di haftaim Kòrsou a pone mas preshon. Enbes di hunga mas trankil i kordiná e hungadónan di Sürnam a kai den trampa di e kontrinkante.