WILLEMSTAD – Kòrsou ta haña su promé EducationUSA Advising Center, parti di un ret internashonal di sentronan di konseho di studiante den mas ku 175 pais.

E Sentro ta bini den e anterior edifisio di SSC na Otrabanda. E sentro Merikano ta uni su mes ku e ret di ministerio Merikano di Asuntunan Eksterior di mas ku 430 sentro di konseho di studiantenan internashonal.

Sentro di konseho EducationUSA ta promové edukashon superior serka studiantenan rònt mundu ofresiendo nan informashonnan detayá, ámplio i aktual tokante posibilidatnan pa studia na institutonan pòstsekundario akreditá den Estados Unido.

E konsehonan grátis ku ta ofresé e futuro studiantenan internashonal ta ofresé rekurso- i instrumentonan pa yuda ora di orientá den e sinku stapnan pa un estudio Merikano: eksplorá skolnan, identifiká posibilidatnan di ayudo finansiero, yena petishonnan, optené un visa di studiante i prepará pa biaha.

Tin mas ku 4.700 instituto akreditá pa edukashon superior den Estados Unido i e sentronan di konseho di EducationUSA por yuda studiantenan redusí nan opshonnan, definí nan prioridatnan i plania nan karera di estudio.

Unabes habrí, EducationUSA di Kòrsou huntu ku EducationUSA di Aruba lo ofresé studiantenan den Karibe Hulandes aksesibilidat inkomparabel pa haña informashon i konseho grátis pa yuda nan konstruí un futuro floresiente.

Konsulado Merikano ta bisa ku nan tin stimulashon di prosperidat ekonómiko i bienestar di personanan riba e islanan den Karibe Hulandes hopi na pechu.