WILLEMSTAD – Kòrsou a desaroyá un Ordenansa di Lei unilateralmente pa evitá impuesto dòbel. E ordenansa di lei ta regla situashonnan spesífiko kaminda no tin un tratado di impuesto entre dos pais.

Den kasonan kaminda un habitante di Kòrsou tin entrada di un otro pais i tin un tratado di impuesto entre e dos paisnan aki, e ora ei e tratado di impuesto ta determiná kua pais tin mag di kobra impuesto riba e entradanan.

Na momentu ku no tin un tratado di impuesto entre e dos paisnan aki, esaki lo trese hopi inseguridat kuné, ku e riesgo ku lo mester paga impuesto den ámbos pais riba e mésun entrada.

E Ordenansa di Lei  ta adaptá e sistema fiskal di Kòrsou na e normanan ku ta aseptá internashonalmente, e ministerio di Finansas ta bisa. E intenshon ta pa redusí restrikshonnan fiskal pa Kòrsou komo lugá di biba òf lugá di residensia i ofresé asina mas seguridat unda mester kobra riba e entrada.

Dos forma

Ta ofresé dos forma – método di dispensashon i método di kompensashon – pa evita ku ta kobra impuesto dòbel. Ta dependé di e tipo di entrada i e tipo di impuesto, kua método lo apliká.

Pa loke ta trata e método di dispensashon pa un habitante di Kòrsou ku ta gosa di entrada estranhero, e habitante ta haña dispensashon pa e impuesto ku ta relashoná ku e entrada estranhero.

  
Pa apliká e método di dispensashon ta importante ku e entradanan estranhero berdaderamente ta someté na e impuesto estranhero. Ta importante pa remarká ku e total di e dispensashon ku ta duna no mag di ta mas haltu ku e impuesto ku lo mester paga a base di e sistema fiskal di Kòrsou.

E método di kompensashon ta duna e posibilidat pa kompensá e impuesto ku a paga den estranheria ku e impuesto ku mester paga na Kòrsou. Aki tin dos límite. E promé límite ta trata e impuesto ku ta paga den estranheria. E di dos límite ta trata e impuesto ku mester paga na Kòrsou. E meta di e di dos límite ta pa evitá ku ta kompensá un montante mas haltu di impuesto estranhero ku lo mester a paga na Kòrsou pa e entrada ei.