WILLEMSTAD – Departamentu di Asuntunan Públiko, mihó konosí komo Kranshi ta bai bira digital. For di djaluna ofisina di registro sivil ta usa prent digital i ‘leges’. Na mes momentu ta introdusí papel protehá kontra froude pa dokumentunan ofisial.

E introdukshon di papel protehá kontra froude ta nifiká ku por ehèmpel ta drùk akta, resumen i otro dokumentu ofisial riba papel ku tin karakterístika ku ta garantisá ku e dokumentu ta outéntiko. Ademas un dokumentu riba e papel protehá kontra froude tin semper un number úniko pa garantisa su outentisidat.

Pa loke ta trata e prentnan digital i ‘leges’, Kranshi ta introdusí un sistema nobo di prent digital mediante e sistema di kaha digital Key2betalen.

Ku e sistema aki ta dokumentá den e historia informashonnan di pago pa prent i ‘leges’ riba dokumentunan ku Kranshi a emití. E sistema ta drùk informashonnan di transakshon, inkluso e preis di e dokumentu riba e papel protehá kontra froude.

Asina ta redusí e karákter delikado pa froude konsiderablemente. Ademas e sistema aki ta yuda pa manehá transakshonnan finansiero mas efisiente i sigur ku posibilidat pa lokalisá transakshonnan, lokual tabata difísil den pasado.  Ta uza e sistema pa tur pago pa optené por ehèmpel akta-, resibu- i otro dokumentunan ofisial.

Kranshi ta anunsiá un periodo di transishon di seis luna kaminda dokumentunan ku no a drùk riba papel protehá kontra froude i no tin ‘leges’ ta keda bálido ainda. Ta pidi tur esnan enbolbí pa tene kuenta ku e kambionan menshoná aki ora un kliente presentá dokumentu riba papel protehá kontra froude.