KRALENDIJK – For di 8 di òktober e búskeda di un krokodel na Boneiru tin tur hende den su gara. Sjon van Essen, director interino di e organisashon di naturalesa Stinapa, a konfirmá ayera ku resientemente a kapturá e animal i a traslad’é pa un sitio adekuá. E krokodel, ku a haña strès pa motibu di e akshon di kaptura, ta awor bou di kuido i opservashon di veterinarionan i Stinapa.

E krokodel, un macho, ta un krokodel Merikano di 2,34 meter largu. Dos veterinario ku a saminá e animal, ta bisa ku e krokodel ta mustra símptomanan di strès. “Lamentablemente nos no sa kon e krokodel lo reakshoná riba e fase di strès aki,” Van Essen ta deklará. “Pa nos ta di gran importansia ku ta garantisá e bienestar di e animal.” Djasabra anochi empleadonan di Stinapa a logra kapturá e krokodel, pa despues tene e animal temporalmente na un lugá seif. Djadumingu a traslad’é pa un sitio ku e veterinarionan a aprobá.

Segun Van Essen e bienestar di e krokodel ta na promé lugá pa Stinapa. “A saka sanger pa hasi análisis di DNA,” e ta informá, pa di e manera aki Stinapa haña mas informashon di e animal. Van Essen a laga sa si ku ta muchu tempran pa bisa kiko ta bai pasa finalmente ku e animal. E orígen eksakto di e animal i kon el a yega Boneiru, ta keda por lo pronto dudoso.