KRALENDIJK- Den oranan di mardugá di djaweps 14 di sèptèmber 2023, un kaso di pegamentu di kandela intenshonal a tuma lugá na Kaya Hulanda. Riba e dia aki a pega un outo para pafó di un kurá di kas, na kandela. 

KPCN awor ta pidi yudansa pa buska e sospechosonan. Riba e siguiente imágennan, por mira e sospechosonan moviendo riba baiskel promé ku a sende e vehíkulo na kandela i despues ku nan a kaba kometé e akto. 

Esnan ku rekonosé e personanan aki, òf tin informashon ku por kondusí na nan, por tuma kontakto ku polis na 715 8000 òf via di e liña di tep anónimo 9310.