KRALENDIJK – Sea Turtle Conservation Bonaire (STCB) a logra kolektá 13,363 dòler durante e kampaña ’11K for Sea Turtle Research in Lac Bay’.

Pa e kampaña, kordinadó di kampo Daan i stashèr Kate a landa 11 kilometer rònt Klein Bonaire riba 30 di yüli. Un esfuerso basta konsiderabel, hasta ora ku wer ta bon i no tin un koriente demasiado fuerte. Na tur e landamentu a tuma ocho ora pa kompletá. 

E kampaña a logra generá mas ku e meta original di 11,000 dòler. E fondonan adishonal lo ta usa pa mas protekshon di e tortuganan den awanan di Boneiru.

E fondonan ta destiná pa kumpra dos ret nobo pa investigashon, ku ta esensial pa monitoriá e salú i spit di kresementu di tortuga bèrdè den Lac. E ret aktual mester di remplaso, i sin e material nobo, e investigashon lo no por sigui. 

Agradesido

STCB a mustra su gratitud na tur ku a duna sèn i tambe spònsernan di e evento. Van Den Tweel Supermarket a patrosiná tur koi kome i bebe pa e landandónan, mientras Stichting DierenLot a redoblá e promé 1.250 dòler ku a drenta na donashon.