WILLEMSTAD – E lei nobo pa sektor di hunga plaka na Kòrsou probablemente lo tin retraso. Esei minister Silvania ta bisa riba e sitio wèb iGaming.

“Nos ta hasiendo esfuerso na e momentunan aki pa aseptá e ordenansa di lei i e dekreto gubernamental na mart 2023. Esaki ta dependé sinembargo di algun faktor ku nos no tin influensia riba dje. P’esei nos no por garantisá ku e lei lo drenta na vigor na mart 2023.”

No ta bisa kiko e faktornan ta eksaktamente. Pero reformenan radikal por trese kuné ku e empresanan ku tin pèrmit ta muda for di e isla i bai establesé otro kaminda i ku operadónan ta trahando kaba riba plannan alternativo ora ku Kòrsou introdusí e lei nobo.

Silvania ta bisa ku e isla ta hopi adelantá den e proseso pa adoptá e sugerensia di e sektor pa un reforme di e lei stap pa stap, na lugá di un revishon masal di un dia pa otro.

“E reto di mas grandi sigur ta pa haña un balanse perfekto entre e nesesidatnan di gobièrnu i e kontroladónan, e operadónan, e sektor di trùst i naturalmente e hungadó di plaka.”

Den e ordenansa di lei Kòrsou a pone en todo kaso un periodo di transishon pa suministradónan di servisio ku na e momentu aki ta ofresiendo servisionan di wega di plaka ku un pèrmit di Kòrsou.

Magnitut 

Segun e minister mester bai ku koutela ora ta balorá e magnitut di e sektor. Segun e minister esei no ta bon regulá i ta p’esei ta difísil pa duna un bista di e magnitut.

A desaroyá e ordenansa di lei ku ta regulá (ònlain) wega di plaka kaba, i tambe e dekreto gubernamental ku ta kompañ’é. E departamentu hurídiko di gobièrnu a revisá e lei i ta inkluí nan remarkenan  awor den e lei, minister Silvania ta bisa.

No a inkluí hungamentu di plaka crypto ainda den e lei segun minister di Finansas i por lo pronto lo no ta posibel pa ofresé e servisionan aki ku un pèrmit di Kòrsou.

Aktualmente ministerio di Finansas ta konsultando e sektor di trùst di Kòrsou pa nan último remarkenan riba kontenido di e lei. E siguiente lunanan di aña e lei ta pasando den e último fasenan di e proseso di lei i na final votamentu den parlamentu.

Segun iGaming e operadónan ta teme ku e leinan nobo di wega di plaka di Kòrsou lo introdusí límite pa depositá i lo èksihí obligashon pa hungadónan identifiká nan mes.