Pa Caribisch Netwerk | Eva Breukink

WILLEMSTAD – E pregunta no ta si e prosesamentu di residuo na Kòrsou mester ta mas duradero, pero kon. E lugá di tira residuo, den boka di pueblo yamá ‘Landfill’, aki djes aña ta yen. Empresa di prosesamentu di residuo Selikor ta buskando solushon.

For di komienso di òktober ta tira tur dia karga di dos pa kuater trùk’i sushi na un sitio speshal na Lèntfel. Einan alrededor di binti investigadó ta surti e sushi pa kategoria den 23 baki, manera diferente sorto di plèstik, karton, sushi di kurá, glas i elektrónika.

Esaki ta e promé fase di e proyekto ‘Transforming Waste to Value’ (Transforma Sushi den Balor) ku lo dura te aprel 2024. Selikor a haña 1,4 mion florin i ayudo tékniko via di Union Europeo pa esaki. E análisis di residuo ta kondusí na un plan polítiko nashonal pa maneho residual. E manera di traha nobo ta duradero i sirkular.

Anteriormente tal plannan di maneho tabata terminá hopi biaha den un lachi, lider di proyekto John Amarica di Selikor ta rekonosé. “Pero kontrali na djes pa binti aña pasá awor si tin fondonan disponibel i invershonistanan potensial pa ehekutá e plannan.”

Inventarisashon di tur residuo 

E promé stap aki ta esensial pa determiná finalmente kua solushon(nan) duradero ta posibel i viábel pa Kòrsou. “Nos ke haña un bista mas kompleto posibel di kiko tin komo residuo riba e isla.”

“P’esei nos ta inventarisá tambe e fluhonan di residuo ku no ta yega serka nos. Mèrs di un kunuku di galiña por ehèmpel, òf tur kos ku ta bai empresanan di resiklahe.” Líkido i residuo ku a dúmp ilegal no ta kai den e investigashon aki. 

E ofisina di investigashon lokal EcoVision ta traha huntu ku ekspertonan Hulandes di Royal Haskonig i De Afvalspiegel. Nan ta analisá den dos luna e residuo di minimal nobenta trùk di sushi. Despues di un siman i mei ta muchu tempran ainda pa konklushonnan, pero mayoria di e residuo tabata orgániko. “Tambe notablemente hopi produkto di higiena, manera bruki i fèrbant femenino. Esei nos no a fèrwagt.”

E informashon di Waste Characterization Study ta base atrobe di diferente estudio di faktibilidat. Ta wak por ehèmpel e kantidat di un tipo di residuo i e posibilidatnan pa prosesá nan duradero.

Komo ehèmpel Amarica ta menshoná glas. “Tin sufisiente na Kòrsou pa resiklá? Tin sentido pa transportá.”

E posibilidatnan pa prosesamentu di residuo duradero ta enorme. Ta trata tambe di invershonnan grandi. “E estudionan di faktibilidat ta nesesario pa skohe e solushonnan mihó i mas viábel pa e isla,” Amarica ta bisa i ta duna un ehèmpel. “Por ta ku empresanan lokal ta resiklá un sierto tipo di plèstik kaba. Huntu ku loke nos ta haña na Lantfel esei lo por ta sufisiente pa un invershon nobo.”

Programa-UE RESEMBID E proyekto ‘Transforming Waste to Value: Desaroyando un Struktura sólido di Maneho di Residuo Sostenibel, Sirkular i Resiliente’ ta kore en todo kaso te aprel 2024 i ta haña finansiamentu di Union Europeo (UE). Esei ta sosodé via di e programa  The Resilience, Sustainable Energy, and Marine Biodiversity (RESEMBID). E programa RESEMBID ta sostené inisiativanan pa desaroyo duradero den ‘Caribbean Overseas Countries and Territories’ (OCT’s) ku fondonan i asistensia tékniko. Kòrsou ta un di e paisnan ku ta bini na remarke.