KRALENDIJK – Durante dos dia un grupo di masoménos 15 lider di MPB a sigui un kurso di dos dia tokante historia di polítika na Boneiru. Esaki a sosodé den sala di Fundashon Históriko Kultual Boneriano (FuHiKuBo). Bòi Antoin i René Roders a duna e kurso aki. E kursistanan a bisa na final ku nan a keda bou di impreshon di loke nan a tende.

E promé anochi Antoin a bai bèk pasado, papiando di e tempu promé ku partidonan polítiko a lanta riba e isla aki. Entre 1833 i 1938 tabatin ‘Koloniale Raad’, un órgano di konsulta di Kolonia Curaçao. Esaki tabata e predesesor di Staten di Antia Hulandes. ‘Koloniale Raad’ tabata konsehá gobernador di kolonia. ‘Curaçao en Onderhorigen’ te na 1936 tabata e nòmber usá pa Aruba, Boneiru, Kòrsou, St. Eustatius, Sint Maarten i Saba.

Dékada sinkuenta

Tantu Antoin komo  Roders a dediká hopi atenshon na dékada sinkuenta, tempu ku loke por konsiderá komo polítika lokal a hasi su entrada, ku Partido UNI i Partido Progresista Boneriano. Despues di kiebro entre Lodewijk (LD) Gerharts i Julio Abraham, lidernan di UNI, a bin kambio signifikante den panorama polítiko. Grupo Gerharts a integrá ku Partido Progresista Boneriano (Uní), miéntras ku Abraham a lanta Partido Demokrátiko Boneriano.

Roders, kende aña pasá a publiká un buki tokante biografia di LD Gerharts, a papia durante un ora i mei tokante e persona akí, kende a bira víktima di un konspirashon di su opositornan polítiko, ku a pone ku el a resultá den prisòn i pone fin na su karera polítiko.

Demokrat

Bòi Antoin a atendé historia di polítika den e dékadanan ku a sigui desde e tempu ei, manera e entrada di Toon Abraham den polítika, siguí despues pa su ruman Jopi Abraham i seguidamente Jopi su yu Clark Abraham komo lider di Demokrat.

Mas aleu Antoin a papia riba Broertje Janga, un fenómeno den polítika boneriano, kende tambe a bira víktima di konspirashon. E tabata den Demokrat, pero den e promé mitar di dékada sesenta ta bandoná e partido akí i ta bai elekshon ku Partido Obrero Boneriano (POB), ku tabata eksistí kaba.

A atendé e elekshon históriko pa Staten dia 5 di sèptèmber 1969, den kua e lista di Kombinashon pa Kambio (PPBU i POB) a tumba Demokrat ku tabatin 15 aña na poder. Un di e konsekuensianan tabata lantamentu di Partido Patriótiko Boneriano.

Antoin a papia di partidonan polítiko ku a eksistí durante 70 aña, tambe di e polítikonan mas markante, sistema di hiba polítika, asta marcha, kantika i djengelnan polítiko.

Impreshoná

E partisipantenan na e kurso a keda impreshoná pa tur loke a sosodé den historia polítiko, spesialmente e kasonan di LD Gerharts i Broertje Janga. Segun Elvis Tjin Asjoe a bisa, MPB semper a invertí hopi den formashon pa su lidernan.