KRALENDIJK – E torneo International Bonaire Bolas Criollas a ranka sali ayera nochi. Nobentiun tim ku partisipantenan di tur edat, entre nan hendenan muhé, hendenan hòmber i muchanan di Kòrsou, Aruba i Boneiru ta kompetí ku otro. Gregory Daal, ku ta un di e organisadónan, ta papia entusiasmá di e organisashon i e estilo internashonal di e torneo na Boneiru.

E aña aki e torneo International Bonaire Bolas Criollas ta mas grandi ku nunka. “Esaki ta e edishon internashonal mas grandi te ku awor. Nos tin 91 tim. Normalmente timnan di Venezuela tambe ta partisipá. Lástimamente nan no t’ei e aña aki,” Gregory Daal ta bisa. E evento ta tuma lugá tur aña na un otro lugá. Despues di Boneiru e ta bai Aruba otro aña, despues Venezuela i despues Korsou. E organisashon a traha kuater luna riba e preparashonnan, lokual segun Daal tin di aber ku algun desafio ku e federashon lokal na Boneiru.

A transformá e fèlt di futbòl den un evento di Bolas 

E torneo a kuminsá djaweps kaba i ta dura te ku djadumingu. Riba e kaminda di Kralendijk direkshon di Rincon a transformá un fèlt di futbòl na man drechi di kaminda den un evento di Bolas. A traha diferente fèlt di Bolas riba e fèlt Pal’i Tamarein. E weganan ta tuma lugá durante anochi riba djabièrnè, djasabra i djadumingu. A plania e final riba djadumingu, kaminda muchanan ta kompetí 7’or di anochi, e hendenan muhé 8’or di anochi i e hòmbernan ta hunga 9’or di anochi.

E tim di Live99.fm Boneiru a hunga djabièrnè anochi un kompetensia eksitante. Finalmente e tim a pèrdè ku diferensia di sinku bala. Apesar di e derota nan ta keda optimista. “Tur dia ta diferente,” Genevy Nicolaas ku ta un di e hungadónan ta bisa. “Awe nos a pèrdè, pero mañan tur kos por ta diferente.” E tim a hunga djaweps anochi pa promé biaha riba e fèlt di Bolas nobo, pero esei no ta stroba nan di nan meta: alkansá final. “Ku dos viktoria nos por bai kuart final ainda,” segun Ideline Saragosa ku ta Kapitan di e tim. “Por ainda. Nos ta bai traha duru mañan.”

Banda di e aktividatnan deportivo e evento ta ofresé tambe sorpresanan kulinario. Tin diferente stènt ku kuminda, ku ta varia di platonan krioyo te platonan marisko i tambe barbekiú. Tin asta un bar, ku Heineken a spònser, kaminda bishitantenan por gosa di un drinks. Remarkable ta ku aki no ta bende na bòter. Ta basha e bibida den un glas di plèstik.

Apertura riba djabièrnè  

Maske e torneo a kuminsá kaba, e apertura  ofisial ta riba djabièrnè. Esei lo sosodé 7’or di anochi. Daal ta enfatisá ku e torneo no ta bai via e federashon na Boneiru, pero ku a lanta un komishon apart pa organisá e torneo. Apesar di e desafionan aki e tim ta desidido pa laga e torneo bira un éksito. “Nos ta ku un tim di djesun persona. Huntu nos ta bon prepará i nos ta ansioso pa brinda tur hende un tempu tremendo,” segun Daal.