WILLEMSTAD – E aña nobo a kuminsá bon pa kobransa di impuesto pa gobièrnu di Korsou. A kobra kasi djessinku mion florin mas ku na yanüari di aña pasá. Esei ta sali na kla di e sifranan preliminar di ministerio di finansas.

E dos kategorianan mas grandi di impuesto ku ta impuesto di entrada i impuesto di benta a mustra un oumento kompará ku e aña anterior. Gobièrnu a kobra 2,4 mion florin mas na impuesto di entrada, mientras impuesto di benta a mira un oumento grandi di 4,5 mion florin.

Mientras e kobransa di impuesto di entrada entre 2021 i 2023 a mustra diferensianan chikitu, e tendensia pa e kobransa di e impuesto di benta ta mustra un desaroyo positivo.

Na yanüari 2021 gobièrnu a kobra solamente 36 mion florin na impuesto di benta i esei a subi drástikamente te 49 mion florin na yanüari 2022. Un aña despues gobièrnu a kobra 53,5 mion florin, un kresementu positivo di 4 mion florin kompará ku aña pasá.

E kresementu di e kobransa di entrada di benta ta un indikashon ku ekonomia di Kòrsou ta kresiendo i ku medidanan di kumplimentu ta dunando fruta, e ministerio ta opiná. Naturalmente e subida di preis di produktonan lokal komo konsekuensia di inflashon tambe ta hunga un ròl.

E impuesto di benta di 53 mion florin ta indikativo pa e kantidat di nogoshi ku tabatin na dezèmber. Asumiendo  ku den e montante aki no a inkluí pagonan di impuesto posponé, e montante eksakto na benta kolektivo lo tabata laba den 900 mion florin. Pa yega na e montante eksakto, lo mester a kita e montante di e pagonan di impuesto posponé for di e 53 mion florin.

E kobransa di e impuesto di entrada a stabilisá despues di un bahada kuantioso den 2020 komo konsekuensia di e medidadanan di COVID-19. For di 2021 e entradanan a keda stabil.