KRALENDIJK – Partido polítiko M21, representá pa su líder Daisy Coffie, a deklará ku Diputado Hennyson Thielman di Infrastruktura a aktua konta di lei i kontra di e prinsipionan di integridat i étika polítiko. E partido a hasi un apleashon riba Thielman pa ofresé un diskulpa públiko i tene honor na su mes. 

E kritika di Coffie ta relashoná ku e echo ku un kompania asosiá ku Thielman, Hype Event Planner, a organisá aktividatnan den un edifisio sin ku esaki tabata tin un pèrmit di konstrukshon. Thielman a nenga akusashon aki i a desbaratá e akusashon komo “wega polítiko”.

Sinembargo, Thielman a bai mas leu dor di pidi gezaghèber pa investigá e kaso. Resultadonan di e investigashon, publiká dia 5 di sèptèmber, ta konfirmá ku e kompania en kuestion en berdat no tin  un pèrmit di konstrukshon.

“Diputado Thielman a krea konfushon i un impreshon robes serka tantu Konseho Insular komo pueblo di Boneiru, pa medio di tira blòf i urgi gezaghèber pa laga hasi investigashon riba státùs di nan pèrmitnan, miéntras ku diputado tabata bon na altura ku nan kompania no tin un pèrmit di konstrukshon na e sitio menshoná”, Coffie ta skirbi.

Kontra di lei

Coffie ta argumentá ku kondukta di Thielman no solamente ta sin étika, sino tambe kontra lei. Kiko ta hasi e kaso ainda mas signifikante, segun lider di partido M21, ta ku Diputado di Infrastruktura mes ta responsabel pa ortogá e tipo di permisonan aki, loke ta kousa preokupashon tokante posibel konflikto di interes.

“Ta un kaso serio? E kontesta ta “si”, pasobra akí ta trata di violashon di nos reglanan ku konosementu di e diputado”, Coffie a bisa.

Segun Coffie, Thielman no tin otro opshon ku ofresé un diskulpa públiko pa e eror i despues evaluá den ki grado e ta gosa ainda di sosten den Konseho Insular.